WA PAY klarong desisyon nga giluwatan si LeBron James kon magpabilin pa ba siya sa Miami Heat o mobalhin ba og team nga dunay dako og kahigayonan nga makalangkat og kampiyonato.
Apan bisan pa man niini, daghang mga team nga nanikaysikay nga gustong mohaylo sa two-time finals MVP.
Usa na niini mao ang Houston Rockets nga andam nga mobuhi og players aron lang makahatag og saktong offer ni James. Andam silang mo-release ni Omer Asik ug Jeremy Lin.
Ang Rockets aduna nay solidong panagpares nila ni James Harden ug Dwight Howard ug kon madayon ni, dili na unya basta-basta ang Big 3 sa Rockets – James, Harden ug Dwight Howard.
Ang pagpahaom na lang unya sa system ug sa chemistry maoy tutukan ni coach Kevin McHale.
Nagtinguha usab ang Cleveland Cavaliers nga mabitik nila pagbalik si LeBron James. Di lisod sa ang Cavs kon salary cap ang hisgutan kay dako pa man og space.
Pero kining ilang pag-una-una og kuha og coach nga wa pa gani sila ka negotiate ni James posibling mahimong babag sa pakuha og balik sa ilang kanhi star player.
Kini si David Blatt, bag-ong coach sa Cavs, wa pay agi sa NBA apan nindot og record ang coaching career niini didto sa Europe. Pero kadudahan kon mohaom ba ang sistema niini ngadto ni James kay lahi ra ba ang templada ning European basketball.
Laing mga superstar nga molandig unya sa free agency mao sila si Carmelo Anthony ug Kevin Love.
Ang Chicago Bulls mi-review na karon sa ilang salary cap ug giistudyohan ang pag-release unya og pipila ka players aron matanyagan og sakto si Anthony.
Mas gihatagan nila karon og prayoridad si Anthony kay ni Love kinsa gitinguha usab nga mahitapon sa Golden State Warriors.
Pero sama ni Anthony ug James daghan usab ang nagtinguha sa serbisyo ni Love.
***
(junmigs0622@yahoo.com)