MAAYONG adlaw kanatong tanan nga mga suki sa Super B. Ning semanaha. Atong hisgutan ang plano ni Mayor Rodrigo Duterte nga pasudlon ang Malaysian ug Thai companies nga mamuhunan sa libuan ka ektaryang palm oil plantations sa Paquibato District.

Nindot kini nga plano tungod kay mapuslan ang wa gitikad nga kayutaan sa Paquibato, ug labaw sa tanan, makabenepisyo niini ang mga mag-uuma ilabina ang mga lumad nga namuyo didto.

Daghan ang nakasulti nga maayo kini tungod kay sa mga lugar nga gisudlan sa palm oil plantation, miasenso ang kinabuhi sa mga tawo.

Apan di tanang sektor pabor niini sanglit unang nagpadayag sa ilang pagsupak ang Panalipdan Southern Mindanao.

Suma sa grupo nga dunay negatibo nga epekto ang palm oil plantation.

Dako ang impak

"Ang impak sa plantasyon mao ang pagkawagtang sa biodiversity, pagkaguba sa lasang ug watershed areas, di patas nga bahinay sa ginansiya, di maayong kondisyon sa panarbaho, polusyon sa tubig ug pagkahug sa yuta paingon sa patag ug pagkawagtang sa nutrina sa yuta." Belen Galleto, spokesperson, Panalipdan Southern Mindanao

Daghang istorya

"Magtindog ka'g power plant, daghan istorya. Pag-abot sa brown out, sige reklamo nga igang. Karon og naa na diha, hangtud karon yawyaw gihapon. Kamoy pangita og alternative diha. Kamoy pangita'g paraan og unsaon pagtabang sa atong katawhan. Pangita mo'g programa nga makatabang sa tawo. If you are smarter than I am, then go ahead. Kay mao ra man ni ang gi-offer, mao ra pud akong gisulti. Wala naman puy lain. Fundamentally, basic kaayo na. You must accept the theory or the preposition nga ang Pilipinas ang salvation ani is agricultural endeavors." Mayor Rodrigo Duterte, Davao City

Makaayo

"Sa akong nakita, maayo man ang plano ni Mayor Rody kay ang makabenepisyo niini mao man ang mga mag-uuma sa Paquibato District. Bright ang atong mayor, so nahibalo siya kung unsay makaayo sa mga Dabawenyo." Jesusa Embad, Cabantian, Davao City