KADAGAHANAN natong mga Filipino kombinsido nga ang tulo ka mga senador nga giakusahan nga nalambigit sa pork barrel scam sad-an sa pagkawkaw sa binilyon nga buhis sa katawhan.

Gani, daghan ang nagsulti nga angay gyud nga prisuhon sila Senador Juan Ponce Enrile, Ramon "Bong" Revilla Jr. ug Jinggoy Estrada.

Ug dihang mitahan sa kaugalingon si Revilla, daghan ang nalipay kay ilang nakita sa bilangguan ang senador. Apan duna say nagyawyaw tungod kay nindot man kaayo ang iyang prisohan.

Usa sa mga nagyawyaw mao ang kahugpungan sa mga biktima sa Bagyong Yolanda. Alang nila, dali kaayong nakapahimo og nindot nga bilanggoan ang gobyerno alang sa mga giakusahang senador, apan hinay pa sa bao ang paghimo og kapuy-an alang sa biktima sa bagyo.

Gitubag sab hinuon sila sa Malakanyang pinaagi sa pagsulti nga ang ilang gipanalipdan mao ang seguridad sa mga giakusahan nga senador mao nga dunay gihimong temporaryong bilanggoan samtang wa pa nakahukom ang korte kon diin sila prisuhon.

Mao kini ang kalahian sa mga ultimo ug gamhanang akusado. Kon ordinaryong tawo ang giakusahan, daw mga baboy silang ipaslak sa hugaw kaayo nga kulungan. Apan kon impluwensiyado gani o kaha politiko ang akusado, daw mga hari sila nga di gani pabatugan sa langaw ang ilang puy-anan.

Di nato mabasol ang mga biktima sa bagyo nga magyawyaw sa gobyerno tungod kay hangtud karon, kadaghanan kanila, wa pa gyud intawoy tarong mapuy-an, apan ang mga senador nga ilang gikasilagan, nindot kaayo ang puy-anan.

Suma nila nga ang giingon nilang kurakot nga opisyales sa gobyerno maoy gihatagan og maayong pagtratar sa atong gobyerno, apan silang gikawatan sa binilyong buhis, gihikawan nga makabangon gikan sa kalisud.