NAGLAUM ang celebrity politician nga si Lani Mercado nga mabisita gihapon ang bana nga si Senator Ramon "Bong" Revilla Jr. nga misurender sa Sandiganbayan.

Ang pagsurender ni Revilla gihimo una pa miguwa ang warrant of arrest human nasuta nga dunay probable cause sa giatubang nga kasong plunder ug graft mahitungod sa kontrobersyal nga pork barrel scam.

Say ni Lani, hulaton nila ang guidelines nga ihatag sa Sandiganbayan.

Nanghinaut sab siya nga mahimong luag ang korte sa mga miyembro sa pamilyang Revilla.

Sa pagkakaron, magpakalig-on sila alang sa ilang pamilya dungan sa pag-angkon nga apektado sila partikular ang duha sa ilang anak nga bata pa.

Niya pa, "Kung pwedeng araw-araw namin siyang madalaw depende sa ibibigay sa aming guideline ng Sandiganbayan o sinuman ang magbibigay ng guidelines kung saan man siya dadalhin. Pinapanalangin namin na kahit paano ay maging maluwag sila sa miyembro ng pamilya."

Sa bahin sab sa anak ni Bong nga si Bryan, dako ang pagsalig niya sa Ginoo nga masulbad ang kaso sa iyang amahan.

Nag-ugat ang plunder case batok kang Bong mahitungod sa pagbulsa sa kapin P200,000,000 gikan sa kickback sa maanomalyang paggamit sa pork barrel scam.