COTABATO CITY -- Moabot na sa 13,064 ka tawo ang namakwit sa baha sa probinsiya sa Maguindanao nga nagsugod pa niadtong miaging semana.
Misaka sab sa 13 ka munisipyo ang naapektuhan sa baha gumikan sa pag-awas sa tubig baha sa Rio Grande de Mindanao ug Liguasan Marsh sa walay puas nga pag-ulan.
Ang mga dapit nga giigo sa baha mao ang Mamasapano,Rajah Buayan, Sultan Sabarongis, Datu Salibo, Shariff Saidona Mustapha, Datu Piang, Datu Abdullah Sangki, Mother Kabuntalan, Northern Kabuntalan, Pagalungan, Datu Montawal, Ampatuan ug Datu Odin Sinsuat.
Matud ni Office of Civil Defense-Autonomous Region in Muslim Mindanao (OCD-Armm) Director Manny Otchotorena nga gibana-banaang mokantidad sa duha ka milyon ka pesos sa mga pananom nga mais ug humay ang gibanlas sa baha.
Nagpasalamat sab si Otchotorena gumikan walay napatay o kaha nahanaw sa nasinatiang pagbaha sa mga ubos nga dapit sa Maguindanao.
Anaa lamang sa palibot ang mga sakop sa OCD-Armm, Armm-Regional Disaster Risk Reduction Management Council (RDRRMC) ug Armm-Humanitarian Emergency Action Response Team (Heart) nga maoy manguna sa ilusad nga rescue operation sa mga residente nga posibling maipit sa baha.
Hinuon, nagkahiusa sila Armm Governor Mujiv Hataman ug Maguindanao Governor Esmael "Toto" Mangudadatu aron mangunay sa pagtabang sa mga biktima sa baha. (Edgar Fuerzas)