GIBATIKOS ni Mayor Rodrigo Duterte kagahapong adlawa ang environmental groups kinsa mibabag sa iyang planong pagdawat sa Malaysian ug Thai companies nga mamuhunan sa libuan ka ektaryang palm oil plantations sa Paquibato District.
Si Duterte nagpaguwa sa iyang pahayag human ang Panalipdan Southern Mindanao mipadayag sa ilang kabalaka labot sa negatibong epekto sa oil palms.
"Magtindog ka'g power plant, daghan istorya. Pag-abot sa brownout, sige reklamo nga igang. Karon og naa na diha, hangtud karon yawyaw gihapon. Kamoy pangita og alternative diha. Kamoy pangita'g paraan og unsaon pagtabang sa atong katawhan," suma ni Duterte sa iyang programang Gikan sa Masa, Para sa Masa kagahapon.
Hinuon, si Duterte wa nagsulti kon unsa nga environmental group ang iyang gitumbok.
"Pangita mo'g programa nga makatabang sa tawo," sulti ni Duterte.
Ang mayor sayong nagbutyag nga usa ka dakong korporasyon ang mamuhunan sa oil palms sa Paquibato District.
Sa laing bahin, ang Panalipdan Southern Mindanao nagsulti nga daghan na sila og kasinatian, pulos lokal ug international, nga ang palm oil plantation di makaayo.
Si Belen Galleto, Panalipdan Southern Mindanao spokesperson, nagbutyag sa negatibong impak sama sa pagkawagtang sa biodiversity, pagkaguba sa lasang ug watershed areas, di patas nga bahinay sa ginansiya, di maayong kondisyon sa panarbaho, polusyon sa tubig ug pagkahug sa yuta paingon sa patag ug pagkawagtang sa nutrina sa yuta.
Si Galleto nagkanayon nga ang grupo nabalaka nga ang mga mag-uuma ug mga lumad sa Paquibato maoy moabaga sa sosyal ug environmental nga galastuhan sa pagpalapad sa plantasyon apan ang benepisyo mopaingon sa langyaw nga kompanya sama sa Malaysia.
Wa kini mauyoni ni Duterte.
"If you are smarter than I am, then go ahead. Kay mao ra man ni ang gi-offer, mao ra pud akong gisulti. Wala naman puy lain. Fundamentally, basic kaayo na. You must accept the theory or the preposition na ang Pilipinas ang salvation ani is agricultural endeavors," suma ni Duterte. (Ariane Caryl N. Casas)