USA ka tawo ang gipriso sa presinto sa kapulisan human gisunog niya ang balay sa ilang silingan nga kanhi konsehal sa siyudad sa Davao alas 2:14 sa kaadlawon, Sabado.

Ang suspek mao si Vonn Andrew Villaruz, 23, nagpuyo sa Purok 1, Relocation, Barangay Panacan, siyudad sa Davao.

Si Villaruz gidala sa Mobile 75 human nangayo og police assistance ang biktimang si Kapitan Dante Apostol, 53, nagpuyo sa Purok 5, Relocation, Barangay Panacan.

Base sa blotter sa Sasa Police Station, ang suspek giposasan nila PO3 Babao ug PO1 Tabanyag tungod kay siya ang gitudlo nga nagsunog sa kurtina sa balay ni Kapitan Apostol.

Si Agapito Billones, saksi sa hitabo, nagsulti nga samtang nag-istoryahanay siya ug live-in partner, ilang nakita ang suspek nga nagdali nga naglabay og bato sa balay sa ilang kapitan.

Ang suspek daling mibiya sa lugar, apan 30 minutos ang milabay, mibalik siya dayon ug giduslitan sa dala niyang lighter ang kurtina.

Maayo nalang kay daling napawong ni Danfrel Apostol ang kalayo mao nga wa na mikanit ang kalayo sa kinatibuk-ang balay.

Ang danyos, suma sa report, mikabat lamang og P6 mil.

Mga pulis nga miresponde sa lugar malampusong misikop sa suspek pinaagi sa tabang sa nakasaksi sa hitabo.

Samtang gikalap kiing balita, giditinir pa sa kapulisan ang suspek samtang gihikay ang kasong arson nga ipasaka sa korte.