NASUBHAN og makutas nga kadaugan si Filipino Dennis “Robocop” Orcollo batok kang Jason Klatt sa Canada, 9-8, sa pagsugod sa WPA World 9-ball Championship group stage sa Doha, Qatar.
Nagsalimoang si Orcollo ning kombatiha sa Group 7 ug kanunay siyang naggukod.
Gikan sa 6-8 nga biya, nimugna og tulo ka sagunson nga kadaugan si Orcollo aron pag-ambak sa winner’s bracket.
Nagkinahanglan na lang og usa ka daog si Orcollo aron makasulod sa top 64 knockout stage.
Ang ubang mga Pinoy nga ningdaog mao sila si Antonio Gabica sa Group 4, Warren Kiamco sa Group 6, Carlo Biado sa Group 8, Raymund Faraon sa Group 9, ug Elvis Calasang sa Group 10.
Ang mga Pinoy nga nangapilde ug natagak sa delikadong loser’s bracket mao sila si Ramil Gallego sa Group 4, ug Efren “Bata” Reyes sa Group 9.
Hinuon aduna pa’y poruhan sila Gallego ug Reyes nga makaabante sa knockout stage kon makasagunson sila og daog sa sunod nilang mga tahas.