NAKADAYEG si NBA All-Star forward Kevin Love sa gipakita sa higanteng si Greg Slaughter sa Master Game Face All-Star Challenge niadtong Sabado sa gabii sa Araneta Coliseum.

Napilde man tuod ang team ni Slaughter nga Team Marc batok sa Team Chris, 135-110, apan siya gihapon ang napiling MVP sa duwa human siya nakamugna og 27 puntos lakip na niini ang tulo ka three-point shots.

Gawas niini, nakuha sa 7-footer nga produkto sa University of the Visayas (UV) Green Lan­cers ug kasamtangang nagduwa sa Brgy. Gineb­ra Gin Kings ang atensyon ni Love, kinsa maoy pinasidunggang dinapit sa kalihukan.

“The big fella, Greg Slaughter – that’s my boy there,” asoy ni Love sa interbyu sa www.spin.ph

“A big fella got the MVP, and I like to see that in all All-Star Game. I thought it was great,” tubag ni Love. “Greg was out there shooting threes, and I think at one point, he made two in a row.”

Si Love miapil sa three-point shootout nga maoy midayandayan sa kalihukan sa halftime.

Miitsa si Love sa duha ka teams diin midaog ang Chris diin nakamugna og 17 puntos si Chris Tiu, 15 kang Love, 13 kang Kevin Ferrer ug 13 kang Jeff Chan.

Alang sa Team Marc, si Love nakahipos og 19 puntos, 13 kang Je­ric Teng, 13 kang Roi Sumang, ug 10 kang Gary David.