MAGSUONG bangis nga kadaugan ang gipangmugna sa magsuong sila si Jason ug Prince Albert Pagara batok sa ilang Mehikanong mga kontra sa “Pinoy Pride XXVI: Fists of the Future” niadtong Sabado sa Waterfront Hotel sa Lahug, Cebu City.
Gikulata’g maayo ni Jason (34-2, 21 KOs) si Mario “Rocky Meraz (20-4, 16 KOs) sa iyang pagposte og 4th round TKO nga kadaugan samtang si Prince Albert (21-0, 15 KOs) nimugna og 1st round TKO nga kadaugan batok kang Hugo “Olympico” Partida (21-4, 16 Kos).
Sa 1st round, napuntos na’g knockdown si Jason dihang iyang gipakaya si Meraz. Imbes mausab ang away, mas nangisog si Meraz ug nakigbinukbokay kini’g insakto.
Adunay higayon sa nagsunod nga duha ka rounds nga nakapalusot sab si Meraz sa iyang mga kumo. Sa 4th round, nakatayming si Meraz ug iyang napabarag si Jason. Sa pagpadayon sa away, makusog nga kumbinasyon sa mga kumo ang gipauwan ni Jason nga maoy nagpatumba og balik kang Meraz.
Nakabangon ra gihapon si Meraz apan ning higayuna, giundang na ni referee Danrex Tapdasan ang away sa ika-2:59 minutos sa round.
Mireklamo si Meraz nganong giundang ang away apan gipasabot ni Tapdasan nga grabe na nga kastigo ang nadawat ni Meraz ug delikado kon mopadayon pa kini sa pag-away.
Gipasabot ni Tapdasan nga mituyok na ang kalimutaw ni Meraz ug nagkurog na ang tiil niini, mga senyales nga kinahanglan nang undangon ang away.
Sa iyang bahin, si Prince Albert mitumba kang Partida sa labing unang higayon pinaagi sa makusog nga right straight sa sayong bahin sa 1st round.
Nakabarog ra si Partida apan aron lang tiwasan kini’g kulata ni Prince Albert. Paingon na sab untang matumba og balik si Partida ug maayo na lang kay miuwang si referee Bruce McTavish alang sa standing 8-count.
Sa pagpadayon sa away, makusog nga left hook ni Prince Albert ang nagtumba og balik kang Partida ug ning higayuna, wala na moihap ang referee ug giundang na ang away.
Sa undercard, si AJ “Bazooka” Banal nakabawi gikan sa 1st round knockdown aron pagposte og 2nd round knockout nga kadaugan batok kang Indonesian Defry “The Hammer” Palulu.
Sa laing bahin, miresulta sa 3rd round technical draw ang away nila ni Jimrex Jaca ug Japanese Masayoshi Kotake.