DUNAY daghang diskarte unsaon sa pagdasig sa mga negosyante pagbubo og puhonan sa usa ka lungsod o siyudad. Usa ini ang pagpalig-on sa aspeto sa kampanya batok kriminalidad.
Sa dakbayan sa Sugbo maoy labing una nga grupo sa mga pulis nga nilangkob sa gitawag nga Special Weapons and Tactics (SWAT) sa miaging kapin sa napulo ka tuig na ang nakalabay.
Si kanhi Bise Mayor Renato Osmeña maoy maisip nga Father of Cebu City SWAT. Si Col. Clifford Gaeranod nga niadtong panahona usa pa ka tenyente maoy nibarog nga lider ug diha sa iyang kiliran ang batid sa pag-diffuse og bomba nga karon koronel na sab nga si Arnel Banzon.
Ang ilang abilidad nanakod sa mga sakop ug paglabay sa pipila lang ka bulan nahimo na nga kabahin sa estorya sa mga tawo sa mga sitio, mga negosyante, subdivision, didto sa bukid, apil na sa pundok sa mga kriminal lahos na ngadto sa mga prisohan naghisgot ang mga piniriso giunsa sila pagdakop sa Cebu City SWAT.
Di maihap ang mga delikado nga alarma nga ilang gitubag ug gisulbad. Nahibalo ba mo
nga ang Cebu City SWAT nakaengkwentro og duha ka hubog nga sakop sa Presidential Security Group nga nanion sa driver sa taxi nga ilang gisakyan. Human nireklamo ang driver, gisikop nila ang duha ka PSG, gibawian sa armas ug gipriso. Dili lang PSG apil na ang ubang sakop sa militar ug PNP nga sa hunahuna sa mga ordinaryong tawo lisod dakpon, way kahadlok nga ilaha kining girespondihan. Apil natong hilig kaayong magpapulispulis.
Labaw sa tanan ang mga kriminal naapil sa ilang plano ang kaisog sa Cebu City SWAT.
Hangtod karon nagpabiling lig-on, isog ug kasaligan ang maong grupo.
Sama sa ubang SWAT sa Mandaue City, Lapu-Lapu City ug sa Cebu province nga pulos nakadawat sab og grabing pagdayeg sa mga tawo nga ilang gialagaran, usa ka dakong hagit alang sa City of Naga SWAT ang paghatag og kinasingkasing nga kahulogan nganong giisip sila nga elite force sa ilang siyudad. Ang subra sa tulo ka bulan nila nga training labot sa urban warfare, diskarte sa mga crisis situation ug labaw sa tanan ang nakat-onan nila sa ilang mga inahan nga magpabiling matinud-anon sa tanang panahon, magpaubos bisan hinangad sila sa katilingban, dili hambugero bisan sakto sa abilidad, ug ang pagka mahadlokon sa Diyos.
Nakasiguro ko nga ang mga damgo ni Mayor Val Chiong nga instrumento sa maong katukoran ug ang paningkamot ni Col. Noel Gillamac sa pagpili sa labing takos mentally and physically dili masayang. Sa mga sakop sa City of Naga SWAT angay sab ninyong hinumduman usa lang ka abuso sa usa ka miyembro madalahig gyud ang tanan ug dugay kaayo na nga bawion gikan sa gitawag nga public opinion.