KARON pormal nang misulod ang panahon sa ting-uwan, kitang tanan kinahanglan alerto sa baha o lunop, labi na kadtong nanimuyo sa risgong dapit sa baha o lunop ug pagdahili sa yuta, tungod sa pagbunok sa uwan matag-karon-ug-unya bisan walay bagyo.

Dangog usab ang kadalanan kon mag-uwan nga kinahanglan nga batanyan sa mga motorista ang prino human dili kaayo mokupot lakip sa ligid nga modakin-as lang kini sa dalan.

Maayong maghinayhinay lang sa pagpamaneho.

Sama sa nahitabo sa usa ka bus sa Ceres nga nalimbuwad sa highway sa Barangay Dawis Norte sa lung­sod sa Carmen padulong sa amihanan sa Sugbo kagahapon, diin dili mominos 30 ka pasahero ang angol.

Sumala sa taho, ang bus ni-overtake og traysikol apan sa iyang pagbalik sa insaktong lane, nadakin-as ug nalimbuwad tungod sa giingong kadangog sa dalan sa dapit tungod sa uwan.

Mabasol ba nato ang dalan o uwan? Dili. Naa sa tawo o drayber nga nagmaneho sa sakyanan ang desisyon. Bisan sa pamahayag sa drayber nga dili kusog ang iyang dagan apan, lisod tuhoan tungod sa kagrabe sa resulta sa disgrasya.

Hinaut nga maghatag kini og leksyon sa ubang drayber labi na sa mga publikong sakyanan nga lagyo og biyahe nga doble ang pagbantay sa pagmaneho labi ning ting-uwan aron luwas nga makaabot sa tagsatagsa nga destinasyon.

Mas maayong hinay ug kanunay kaysa paspas apan walay lahutay tungod sa pagkaaksidente sama sa walay suwerte nga bus sa Ceres nga nalimbuwad sa Carmen.

Bisan sa ubang aspeto sa atong kinabuhi, maa­yong hinayhinay lang -- mithi sa tino nga kalamposan.