KAY insomniac, dugay kong ma­katug. Bisan alas 8:00 na sa buntag, sagad naa pa ko sa kalibutan sa damgo kon mosuol ang akong sakit. Sa alas 8:00 sa buntag niadtong Oktubre 15 sa miaging tuig, sa kalit lang, miuyog ang katre ug natimbakuwas ko sa akong higdaanan bisan nagtuo kong damgo ra to. “Daman ra ni?” pangutana nako sa a­kong kaugalingon.

Nagsige pa man og uyog unya nagkakusog, mikaratil ko og dagan padung sa gawas sa balay, uban ang akong asawa ug anak. “Oh, my God! Oh my God!” pung pa sa akong asawa samtang ako nanghimuta nga nagtan-aw sa balay nga maorag giuyog og agta.

Mingaub ang yuta nga maorag nasuko samtang ako ingon sa naalimu­ngawan pa gihapon, hilom ra. Linog na man diay to. Human sa pagtay-og, dali ming mi-on sa TV aron susihon diin ang epicenter sa linog. Pipila ka minutos ang paglabay, among nahibaw-an nga ang epicenter didto diay sa Bohol. Na-shock mi sa mga kadaut nga among nakita sa TV.

Niadtong Hunyo 9, kaming mga manager ug supervisor sa Sun.Star nag-linog tour sa Bohol. Bisan niadto pang Oktubre sa miaging tuig kadto nahitabo, kuryuso ming makakita kon unsa nay nahitabo sa mga dapit nga gitay-og sa 7.2 magnitude nga killer quake.

Dala ang akong camera nga fully charged ang battery, sayo kong milupad padung sa Pier 1. Alas 6:00 sa buntag ang among sabot, apan alas 5:59, mitunob na ko sa ganghaan sa pier ug dihang didto na ko sud sa fastcraft, midalikyat ko pagbalik sa kalibutan sa akong damgo. Pagmata nako, didto na mi sa pantalan sa Tubigon nga giayo na.

Human sa pamahaw, among gi­­pang­rumbo ang mga dapit nga grabeng naigo, apil na ang fault line sa Brgy. Anonang, bukirang dapit sa Inabangga.

Naa pa ang dakong liki sa Brgy. Anonang. Sa among paglibot sa mga lungsod nga nahimutang sa taas nga fault line, daghan pa gihapon sa mga balay ug simbahan ang wa pa gihapon mapabarog og balik.

Ingon sa miaging semana pa ang linog miigo tungod sa mga timailhan, apan nahanaw na sa panagway sa mga tawo ang kalisang. “Di na makakusog. Wa nay power kay humana man ang grabeng lihok sa yuta. Aftershocks na lang,” pung pa sa tiguwang babaye nga taga Anonang. “Kuyawang, Ma­nang, maora mag taga Phi­volcs,” matod ko sa akong kaugalingon.

Nagpabilin ang mga istrukturang nahugno, apan klaro sa mga panagway sa mga Bol-anon nga hinayhinay na silang nakabangon ug mitukod og balik sa mga tipaka nga gibilin sa usa sa mga labing bangis nga katalagman sa kalibutan.