PIPILA ka mga mamaligyaay sa merkado sa Cogon niingon nga dili usab sila mohunong sa pagpamaligya taliwala nga kanunay silang sitahon sa grupo sa mga Task Force Hapsay Dalan denhi sa siyudad sa Cagayan de Oro.
Si Rolando, kinsa wala na mihatag sa iyang apeliyido nga nahinabi sa Sun.Star SuperBalita ug mamaligyaay sa tsinelas diha sa daplin sa dalan, niingon nga nakasabot siya sa buot ipatuman sa maong grupo nga pagpahapsay apan kung dili usab sila modiskarte dili nila mabuhi ilang pamilya tungod kay ang pagpapamaligya lamang diha sa dalan maoy ilang gakuhaan sa adlaw-adlaw nga panginahanglan.
Gipangayoan kini og reaksyon sa SuperBalita sa mga report nga ang mga mamaligyaay maoy gapasakit sa mga traffic enforcer nga igo lamang nagpatuman sa balaod.
“Ang uban gasukol na gyod na sila kay maalkansi man sila pirme nga kada adlaw ikarga ilang stall, pagkasunod adlaw, ikarga napod ilang stall nga mao pa nila gibuhat. Naa gani uban gahilaka kay wala nay mga baligya kay gakuhaon man sa RTA,” matud niini.
Sa iyang bahin, gibutyag niini nga motayming na lamang siya sa pagpamaligya kung wala ang RTA ug kung nagsugod na sa pagpangsikop iya nalamang hipuson ang iyang baligya.
“Among kinabuhi kada-adlaw sige og dali-dali, gatago-tago kay lisod man kaayo mangabang, pero ako wala sa akong huna huna nga makasakit sa mga enforcer pareha sa uban mosukol,” butyag niini.
Gipangsukmag
Kahinumduman, tungod sa estriktong pagpatuman sa "Hapsay Dalan," pipila na ka mga traffic enforcer ang napasakitan sa mga masinupakon sa balaod trapiko.
Usa sa insidente mao ang RTA officer nga mao si Bryan Hoylar, kinsa gisukmag sa mamaligyaa nga giilang si Alikman Panara sa Barangay Puerto dihang ang grupo sa RTA nag-abog sa mga mamaligyaay nga halos moabot na taliwala sa dalan sa pagpamaligya.
Kalit lang kining giposposan og bato sa ulo hinungdan nadala sa balay tambalanan.
Niadtong niaging bulan, usa ka babaeng mamaligyaay ang misukmag sa usab sa RTA Enforcer.
Taliwala nga kalmado ang RTA sa pagpasabot sa mga mamaligyaay apan padayon sa pagsukmag ang babaeng mamaligyaay.
Si Atty. Edgardo Uy, kinsa chairman sa Task Force Hapsay Dalan, miingon nga iyang giabisohan ang mga traffic enforcer nga mopasaka gyod og kaso.
Nakasabot usab siya sa mga mamaligyaay nga dili na maakomodar sulod sa merkado hinungdan nga gapamaligya na lamang sa gawas apan tungod kay aduna silay gipatuman nga balaod kinahanglan usab nga mosunod sa balaod ang mga mamaligyaay nga gidili sila sa pagpapamaligya taliwala sa dalan. (SVB)