GIPAPANANOM niadtong Sabado sa hapon ang tanan nga mga nakasupak sa balaod trapiko denhi sa siyudad sa Cagayan de Oro kinsa mipasalig nga mohimo na lamang og community service.
Ang mga gatusan ka mga nasikop atol sa pagpatuman sa pagpahapsay sa kadalanan labina diha sa Divisoria nga bahin ang makalukat lamang sa ilang citation ticket nga giisyu sa Roads and Traffic Administration (RTA) kung mohimo sila og community service.
Kini ang gibutyag ni Jhong Salvani, kinsa organizer sa Community Service alang sa pagprotehir sa kinaiyahan.
Gibutyag niini nga iya na nga gikoordinar ang Task Force Hapsay Dalan ug RTA kinsa miuyon sa maong community service pinaagi sa pagpananom og bakhaw kon mangrove diha sa bukana sa Bigaan Bridge sa Zone-8, Cugman ning siyudad.
Tumong sa pagpananom sa bakhaw mao ang pagprotehir sa kinaiyahan tungod kay gikonsidera kini sa Deaprtment of Environment and Natural Resources nga molahutay bisan gyod sa kakusog sa baha o unsa man nga kalamidad.
Gawas sa mga nakasupak sa balaod trapiko apil sa nananom ang nagkalain-laing grupo gikan sa nagkalain laing organisasyon diin apil na niini ang mga opsiyales sa naasoy'ng barangay, kapolisan ug Cdeo Eagles club ug uban pa nga grupo.
Ang kalihokan usab takdo sa kasaulogan nga Environmental month ning umaabot bulan sa Hulyo. (SVB)