KASAMTANGANG gihunong sa Land Transportation Office (LTO) 7 ang pagpang-deputize sa mga tawo aron motabang kanila pagpanakop ug pagpatuman sa lagda sa trapiko sa kadalanan.

Si Arnel Tancinco, ka­samtangang pangulo sa LTO 7 miingon nga ila unang hashasan ang ilang ipang-deputize nga mga traffic enforcer.

Kini aron pagseguro nga mahunong na ang pagpangayog  suburno sa mga enforcer ug gii­ngong pag-abuso sa uban nilang gipang-deputize agent.

Ilabi na karon nga gipatuman na ang bag-ong joint administrative order sa LTO nga gipa­dak-an ang multa  sa malapason sa lagda sa trapiko.

Sa iyang  bahin, ang operations officer sa Citom nga si Joy Tumulak miingon nga makadakop gihapon sila apan ilang ibase sa kalapasan sa traffic ordinance sa siyudad nga mas ubos ang multa.

Nasayran ang LTO mapugos sa pagpang-deputize niadtong mga kawani sa goyberno ug ubang mga law enforcer sama sa pulis, militar ug mga traffic enforcer sa mga local government units tungod sa kakuwang usab sa ilang mga personnel diin di nila maato ang pagbantay sa kadalanan.

Hinungdan nga misi­aw usab ang mga badlungon sa kadalanan.