DILI mominos 39 ka pasahero ang angol, 15 niini grabe, human nalimbuwad ang Ceres bus sa national highway sa Barangay Dawis Norte, lungsod sa Carmen, Sugbo, ala 1:00 sa hapon sa kagahapon.
Ang nagmaneho sa Ceres bus body number 8381 ug plate number 679-CCE mao si Ronald Lato, 35, minyo, taga Barangay Poblacion, lungsod sa Daanbantayan.
Si Lato, nahinabi sa dySS Super Radyo ug Sun.Star Superbalita, niasoy nga gikan sila sa North Bus Terminal sa dakbayan sa Mandaue ug napaingon sa Daanbantayan.
Nialegar si Lato nga dihang niabot sa Dawis Norte, usa ka traysikol nga iyang nasundan ang kalit nihunong hinungdan nga nilihay aron maka-overtake.
Apan, dugang ni Lato, ang bus kalit nisarasay ug dihang niprino, wala niya makontrolar ang manobela hinungdan nga natumba, nabagnos ug nibabag sa karsada.
Gipasanginlan niya ang kadangog sa dalan gumikan sa pagsige og uwan.
Matod niya, iyang nakita ang mga pasahero nga nagrabihan sa aksidente lakip sa mga bata ug dunay nabalian sa ilang mga tiil ug samdan sa ulo.
Samtang siya nagping-it usab sa mga samad sa bildo diha sa iyang bukton, kamot, bukobuko ug ubang parte sa lawas.
"Hangtud sa pagtumba gibagnos mi sa karsada diha ra ko sa manobela akong gipaniguro nga maluwas gyud mi tanan, unsaon disgrasya man gyud ni wala matuyo," dason niya.
Giklaro ni Lato nga dili kusog ang iyang pagpadagan, sanglit 50 kph ra gyud kini, pero gibasol niini ang kadangog sa karsada.
Si Chief Insp. Alvin Balio, hepe sa Carmen Police Station, nagkanayon nga giaresto nila si Lato ug gidala kini sa Cebu Provincial District Hospital, dakbayan sa Danao.
Gihulagway niini nga grabi ang naangol human dunay nabalian sa tiil, daghang samad sa ulo ug gihulagway niya nga maayong pagkagusbat sa bus.
Si Balio mapasalamaton hinuon sa mga nagpakabanang residente, sa mga sakop sa rescuer sa Danao, ug Carmen, nga dali kaayong miabag sa kapulisan sa pagdala sa mga biktima ngadto sa tambalanan.
Matod ni Balio, dili mominos 15 ang grabeng kahimtang ug gibalhin sa tambalanan sa dakbayan sa Sugbo.
Ang bus nakabalda sa trapiko sulod sa pipila ka oras.
"Taas man gud kaayo ning highway diri gikan sa Barangay Guinsay sa Danao, hangtod sa nahitaboan unya puwerti pang pagkadangog maong nakasugat sila og disgrasya," sumala ni Balio.
Kasong reckless imprudence resulting to multiple servious physical injury and damage to property ang atubangon sa maong bus driver.
Si Land Transportation Franchising and Regulatory Board (LTFRB) 7 Director Ahmed Cuizon niingon nga kon way mamatay sa aksidente, dili automatic suspension ang ipahamtang sa bus nga nalambigit sa disgrasiya.
Sulod sa 24-oras gikan sa pagkaaksidente, kinahanglang mosumitir og accident report ang bus company nga nadisgrasiya.
Matod ni Cuizon nga kinahanglan atimanon sa mga kompaniya ang panginahanglanon sa nangaangol nga mga pasahero.
Tan-awon sa LTFRB 7 kon duna pay laing nahimong kalapasan ang drayber ug ang kompaniya sa Ceres gawas sa pagkaaksidente niini.
Sa laing bahin, nabara ang dagan sa trapiko kagahapon sa alas 10:00 sa buntag sa utlanan sa Barangay Perrelos ug Valladolid, dakbayan sa Carcar human usa ka crane ang nalimbuwad.
Si PO2 Madison Singco, alert team sa Carcar Police, nibutyag nga ang crane gipanag-iya sa WTG-Construction gikatahong wala makadaog sa gialsang debris sa karaang taytayan sa dapit.
Ang crane nagbabag sa karsada sulod sa pipila ka oras hinungdan sa grabeng trapik sa habagatan.