Usa ka lola ang nilanding sa balay tambalanan human nabanggaan og motorsiklo niadtong adlawng Domingo sa merkado sa Mahinog, Camiguin mga alas 8:00 sa buntag.

Kritikal ang kahimtang ni Rosinda Aranas, 70, minyo, nga lumulupyo sa nasangpit nga dapit diin nahitabo ang maong insidente.

Gisaysay sa bana sa biktima nga samtang pauli na kining biktima gikan sa Mahinog Public Market dala ang mga kinumpra niini wala kini magdahom nga mabanggaan kini sa usa ka motorsiklo nga wala maila ang nagmaneho niini.

Dugang pa niini nga buot nga mosuot niining motorsiklo kay lage traffic man niadtong higayona sa maong dapit hinungdan nga nabanggaan kining biktima.

Nakaangkon si Aranas og mga pangos ug bun-og sa kalawasan ilabi na sa iyang ulo human kini nabundak kalsada.

Sa pagsulat ani nga balita, ang biktima kasamtangang giatiman pa sa mga doktor sa Northern Mindanao Medical Center (NMMC) ning siyudad sa Cagayan de Oro.

Samtang anaa usab sa talandugon nga kahimtang ang usa ka security guard human kini giingong madisgrasya niadtong Dominggo, mga alas 5:00 sa gabii.

Naila ang biktima nga si Victorio C. Medalla Jr.,40, minyo, nga taga P-2, Zone 1, Katipunan, Villanueva, Misamis Oriental.

Ang biktima gidala sa NMMC ug nakaangkon kini og samad sa iyang ulo, wala nga bukton ug samad usab sa iyang kamot. Nabali usab ang wala nga bahin sa paa, tuhod ug tiil niini ug mga bun-og sa iyang lawas.