PINAL na nga multahan ang mga ginikanan nga magpasagad sa ilang mga anak nga maglatagaw sa kadalanan sa gipatumang curfew dinhi sa siyudad sa Cagayan de Oro.

Kini ang gibutyag ni Konsehal Eric Salcedo kinsa chairman komite sa Social Services sa konseho.

Matud niini nga ang multa sa mga ginikanan ngadto sa mga bata nga masapon nga naglatawaga gihapon sa kadalanan taliwala nga gidili na kanila ang maong oras ang multahan og P500 sa unang kasupakan, P1000 sa ikaduha ug P1500 sa ikatulo nga kasupakan.

Apan gibutyag ni Salcedo nga kung dili makabayad ang mga ginikanan mohimo sila og community service sama sa pagpanglimpyo ug uban pa.

Matud ni Salcedo nga human sa public consultation nga iyang gihimo naaprobahan kini nga mga multa ug taliwala nga proposed pa lamang kini iya pa kining i-agenda sa iyang komitiba ang kalabot sa parental responsibility and liability sa mga ginikanan aron sunod nga lakang maaprobahan na sa konseho.

Dugang ni Salcedo nga iya na usab nga gipa-organisa ang Barangay Council for the Protection of Children (BCPC) tungod kay kung adunay mga bata nga masikop ihatag lang kini sa BCPC ug sila na mao ang magturn-over niini sa ginikanan kinsa aduna usab multa tungod sa iyang pagpasagad.

Kahinumduman gipatuman ang curfew dinhi sa siyudad gikan sa alas 10:00 sa gabii paingon sa alas 5:00 sa kadlawon diin ginadili sa mga bata ang maglatagaw sa mga publikong lugar sama sa parke, mga internet cafes, bilyaran, karaoke bar ug uban pang mga gidili nga lugar. (SVB)