DUHA ka mga lalaki ang pulos nagtingkagol sa prisuhan human nakuhaan og ginadili nga druga atol sa pagpatrolya sa kapulisan sa Barangay Sta. Cruz, lungsod sa Tagoloan Misamis Oriental.

Giila ang mga suspetsado nga mao sila si Phillip Villablanca, 27, ug Edward Adorni, 21, pulos ulitawo, mga residente sa Barangay Bugo ning siyudad sa Cagayan de Oro.

Gibutyag ni Police Senior Insp. Maricris Mulat, hepe sa Tagoloan Police Station, nga nagpahigayon og patrolya ang kapulisan sa ilang area niadtong tungora labina ang patrolya usa sab sa mando ni Police Regional Office Regional Director Isagani Genabe Jr. nga kinahanglan gyod ang patrolya matag gabii o bisan sa kadlawon.

Dihang nakita sa kapulisan ang grupo sa mga batan-on nga nagtambay niadtong tungora ila kining giduolan apan nakita nilang gilabay ug gipasa pasa sa duha ka suspetsado ang giingong usa ka sachet sa gitouhang dunay sulod nga shabu.

Nakumpiska gyod sa mga polis ang usa ka sachet nga gilabay sa duha hinungdan ilang gidala sa prisuhan ug gibalhog ang duha ka mga suspetsado ning panahona kinsa gikaktadang mag-atubang og kasong supak sa RA 9165 kon Dangerous Drugs Act. (SVB)