NAANGKON sa usa ka Dumaguete runner ang kadaugan human sa iyang sunodsunod nga pagkalandig sa ikaduhang puwesto sa dihang nanguna kini sa 21K Hunat Sugbo 4: Dagan Para ni Maning nga gipahigayon sa Parkmall, dakbayan sa Mandaue.
Si Mereeis Ramirez, 35, ug lumad nga taga Dumaguete City, kinsa moanhi lang sa Sugbo matag tapos semana gumikan sa kakuwang sa mga kompetisyon sa ilang dakbayan ug aron masustentohan ang iyang pamilya.
Si Ramirez kinsa nakakuha og 1:38:26 oras nakalabnot sa unang puwesto sa dihang milabaw kini og 11 minutos batok kang Sandra Soliano ug gisundan kini ni Shiela Aligway kinsa nahimutang sa ikatulong puwesto nga adunay oras nga 1:58:43 nga oras.
Matod ni Ramirez nga ang iyang kahiligon sa pagdagan usa na ka parte sa iyang kinabuhi sukad pa sa siya high school hangtod karon nga siya usa ka full-time nga inahan ngadto sa iyang mga anak. Nagkanayon usab si Ramirez nga mihuyang na ang iyang trainings sukad nga nag-eskuwela na ang iyang mga anak.
Si Ramirez nakalangkat sa ikatulong puwesto sa DYAB Kapamilya run niadtong miaging semana ug Eye Run niadtong Hunyo 8 Ang men’s division usab gibidihan sa mga Kenyan Runners nga sila Douglas Mwiti sa oras nga 1:14:03 ug Noel Tillor nga aduna usab oras nga 1:14:44. Genevieve Fernandez; USJ-R MassCom Intern