SA UNANG higayon, ang 2013 Mr. Universe ug Mr. World Pro champion nga si Marek Olejniczak sa Germany, mobisita dinhi sa Sugbo isip guest poser sa 3rd Phil-Asia 2014 Men and Women International Bodybuilding Championship.
Kini maoy gipahibawo ni Dennis Delgado, gym-owner sa Workout Fitness Center, kinsa mao usab ang chief organizer sa maong kompetisyon nga gikatakda karong Agusto 8 ngadto sa 10 sa Workout Fitness Center Capitol Branch ug sa Midtown Hotel.
Moabot sa Sugbo ang 32-anyos kinsa mao usab ang 2013 Arnold Classic Europe champion sa Agusto 8 diin iyang ikahimamat ang iyang mga Sugboanong fans.
Ang 3rd Phil-Asia 2014 Bodybuilding Championships maoy magsilbing qualifying elimination alang sa NAC Universe competition nga himuon sa Germany karong Nobiyembre.
Ang mga partisipante gibahin ngadto sa walo ka division. Kini mao ang Master’s Class, Miss Figure Champion, Mr. Athletic (Open), Miss Fitness Model, Mr. Physique, Physique Masters, Mr. Novice ug Miss Shape.
Mokabat ngadto sa P110,000 nga balor sa premyo, cash prizes nga P25,000 ang madawat sa men’s overall champion ug ingon man libring round trip ticket sa Germany, accommodation ug meals.
Ang makampiyon sa Master’s Class, Miss Figure, Mr. Shape ug Mr. Athletic adunay tag P8,000, championship trophy ug gift packs gikan sa mga sponsors samtang tag P10,000 usab ang mabulsa sa makampyon sa matag kategoriya (small, medium, tall) sa Mr. Physique.
Ang tanang placers sa tanang Class makakuha usab og cash prizes, trophies ug gifth packs. Ang kompetisyon giila sa Samahan ng mga Barbilista sa Pilipinas. (JBM)