WAY AYO. Ang multa sa mga nakasupak sa balaod ug mga lagda sa trapiko sa Land Transportation Office (LTO) panahon pa ni Mampor, haskang gamaya.

Usa ni sa mga hinungdan nga daghan ang mga abusado nga drayber mapribado man nga sakyanan o pasaheroan. Samot na ang mga drayber sa habal-habal wa makaila sa lagda sa trapiko.

Ang protesta nga gipahigayon sa pundok sa mga drayber sa mga de pasaheroan sa miaging semana nga nakaparalisa sa trabaho ug sa eskuyla way nakab-ot nga kaayohan o katuyoan.

Hinuon, ilang gipakita sa kagamhanan ni Pres. Noynoy Aquino ug sa publiko nga mahimo nila nga paurongon ang ekonomiya. Gani, napurwisyo tinuoray ang publiko labina kadtong nanarbaho nga way kaugalingon nga sakyanan ug sa mga estudyante.

Ang mga drayber mismo nakahibawo nga ang multa nga gipahamtang sa LTO dili ni siya aron mokita ang gobyerno apan aron magmatngon ang mga drayber nga dili makasupak sa balaod ug mga lagda sa trapiko.

Nagpasabot ba kining mga drayber sa mga de pasaheroan nga dili sila motuman sa balaod ug mga lagda trapiko kay misupak man sila nga patas-an ang multa?

Kon motuman o subay lang sa balaod ug mga lagda sa trapiko ang mga drayber, way pulos ang taas o dako nga multa sa trapiko.

Ang gusto aning klase sa mga drayber nga sila ang magbuot sa gusto nila nga buhaton sa dalan. Sama sa bisan asa mohunong, mopasakay o pakanaug sa pasahero bisan kon dunay dapit nga gigahin alang niini.

Gani, bisan karon nga ga­may pa ang multa kuwang ang implementasyon sa balaod sa trapiko tungod sa kakuwang sa manakop. Naay LTO apan kuwang sa mga enforcer.

Gawas pa, ang mayoriya sa mga drayber dili man ang mga nagprotesta. Mas daghan ang mga drayber sa pribado nga mga sakyanan nga gusto mapatas-an ang multa aron madisiplina ang mga abusado nga drayber.

Sa akong tan-aw ang atong nasud ang pinakaubos pa og multa sa trapiko. Ang mga silinganan nga nasud sama sa Singapore ug Malaysia dako kaayo sila og multa sa makasupak sa balaod ug mga lagda sa trapiko.

Tungod sa kadako sa multa sa trapiko ning mga nasura ug strikto pa kaayo ang implementasyon sa balaod sa trapiko, ang resulta disiplanado kaayo ang mga drayber ug hapsay ang dalan.

Ang atong kagamhanan ug LTO kinahanglan nga ipadayon ang pagpataas sa multa sa salaud sa trapiko aron maminos ang mga abusado nga drayber.

Kon mahitabo nga mapug­ngan ang implementasyon sa bag-o nga taripa sa bayronon sa multa sa trapiko mogawas nga makusganon ang mga nagprotesta ug talawan ang nagdumala ning atong kagamhanan karon.

****

BIYAHE. Ang pagbiyahe o bakasyon usa ni nga makapawa o makapahupay sa lapoy kon sa English pa stress. Ang pag­bakasyon di kay sa mga adunahan lang apil sad ta bisan og igo lang ang kita.

Apan kinahanglan duna tay paryente o mga suod higala nga maoy atong masak-an ug moabi-abi nato sa mubong panahon nga naa ta sa gawas sama sa USA.

Bisan og di ko adunahan apan usa ka dakong garbo alang kanako nga nakatan-aw ko sa 2014 US Open golf tournament niadtong Hunyo 12-15 didto sa Pinehurst, North Carolina, USA, bisan og wa makaduwa si Tiger Woods.

Akong pasalamat ni pare Halley ug Mercedes Ondona nga maoy akong gisak-an didto sa Southern Pines, North Carolina. Si pare Halley akong silingan sa among lungsod sa Cagwait, Surigao del Sur.

Niadtong Bernes sa hapon, sa akong dakong kakurat akong nakit-an si Atty. Julius Neri nga naglakaw sud sa Garden State mall sa New Jersey, USA, samtang nisuroy mi ni Roy Danlag, bana ni Janet nga manghod ni Dr. Malou.

Sa among mubo nga kuloka­bildo, si Atty. Julius uban sa iyang asawa, Mdm Nelia Garcia, nagbakasyon usab sila sa US. Nag-abot sila ni Julius ug Nelia didto sa Garden State mall samtang nangape mi ni Roy.

Gikan sa Melbourne, Australia, si Roy ug Janet ug mga anak naa na namuyo sa New Jersey nga maoy akong gisak-an. Si Roy nagtrabaho sa United Airlines samtang si Janet nurse sa usa ka ospital. Sa­lamat, Roy ug Janet.

Mao na mga sagabay nga maningkamut ta og trabaho unya mag-ipon og piso-piso kada adlaw aron naay ikapleti sa pagbakasyon.

(atty.ellieE@gmail.com)