DAKONG sayop diay kining atong gigamit nga termino nga “mabugnaw’ng bilangguan.” Kasagaran man god nato kining nadunggan sa mga balita sa radyo ug mabasa sa pamantalaan. Pananglitan: “Ang suspek sa pagpatay sa usa ka negosyante nadakpan sa kapulisan ug nabalhug na karon sa mabugnaw’ng bilangguan.” “Usa ka drug pusher nasignit sa mga awtoridad ug nagtingkagol na karon sa mabugnaw’ng prisohan”. Dili bugnaw nang bilangguan uy. Kay puwerting inita man diay na.
Pangutan-a nang mga tawo nga naka-agi na og priso. O ba kaha kanang anaa pa sa sulod sa prisohan. Dili nimo na init nga puwerting daghana nang mga piniriso sulod sa usa ka selda. Ang ubang mga jails dinhi sa ato, gi-design lang og mga usa ka libo ka mga piniriso nga kapasidad apan aduhay nay sulod nga 2 mil ka mga detainees. Mireklamo man gani si Senador Bong Revilla nga init kaayo ang iyang giprisohan karon sa custodial center sa Camp Crame nga siya rang usa. Ang mabugnaw’ng bilangguan tua ra na sa US kay aircon ang ilang selda didto og duha ra ka piniriso lang matag selda. Lami pa og pagkaon.
Kalabuso na
Nabalhog na sa bilangguan si Sen. Revilla human kini malutsi og warrant of arrest sa Sandiganbayan gumikan sa kasong plunder. Naa na siya sa PNP custodial center sa Camp Crame. Kusganong gisaway karon sa pipila ka sektor ang iyang nahimutangan gumikan kay special treatment kuno. Bisan man gani si Sen. Miriam Defensor Santiago nakasaway man kay mora ra kuno og nagbakasyon si Bong.
Nasikop kagahapon si Senador Jinggoy Estrada, ug basin isunod na si Juan Ponce Enrile. Nagpa-abot ang laing selda alang nila sulod gihapon sa Camp Crame. Para nako okey lang na didto sila prisohon kay bisan og medyo special treatment ang gihatag nila apan priso man gihapon sila ug restricted ang ilang mga nilihukan. Bisan og hatagan pa na sila og bulawan nga katre, piniriso ra gihapon sila. Dili lalim nang mapriso ta uy. Gawas pa senador man sila.
Lisod man pod og itipon na sila sa mga ordinaryong kriminal. Gawas pa wala pa man na usab sila makonbikto. Inig konbikto nila adto na na sila ibalhug sa National Bilibid Prison.
Di magmaya
Sa pagkakaron, dili pa kita angayan maglipay og magmaya ning pagpasaka og kaso og pagkabalhug niining mga tawo nga nahilambigit sa pork barrel scam gumikan kay layo pa ang proseso. Dugay pa mahuman ang husay ning maong mga kaso. Usa-usahon pa kana og presentar ang tanang mga akusado sa korte. Dugay pa na mahuman og posible nga maabsuwelto pa na sila.
(bobby.nalzaro@uahoo.com)