GIUMOL sa Cebu City Council ang Cebu City Anti Discrimination Commission nga maoy motutok sa mga reklamo batok sa deskriminasyon subay sa Cebu City Ordinance (CO) 2339 nga giaprobahan niadtong tuig 2012.

Si Konsehal Alvin Dizon, kinsa maoy nangamahan sa ordinansa, nihangop sa pagpalabang sa balaudnon sa siyudad uban ni Konsehal Margarita Osmeña.

“The passage of the measure will be the city’s contribution in the setting forth a culture that promotes respect and acceptance of all people regardless of their gender, beliefs, orientations, disability,” matod ni Dizon.

Ang commission langkuban sa mayor o iyang representante isip chairman, chairman sa committee on social services sa konseho isip vice-chairman, duha ka konsehal nga pilion sa mayoriya, presidente sa Association of Barangay Council, pangulo sa Department of Social Welfare and Services, City Legal Office, pangulo sa Commission on Higher Education, pangulo sa Regional Commission on Human Rights ug walo ka sakop sa private sector nga tinudlo sa mayor nga aprobahan sa konseho.

Ang commission mohusay sa mga reklamo nga boluntaryong gisumiter sa reklamante subay sa section 4 sa CO 2339 ug mga kaso nga giduso sa korte alang sa paghusay nga way dapigan nga nahisakop sa Katarugang Pambarangay ug sa susamang mga kaso.

Sila usab ang moumol og Implementing Rules and Regulations bahin sa ordinansa ug morekomendar og mga palisiya uban sa paghimo sa ubang trabaho may kalambigitan sa pagpatuman sa CO 2339.

Ang mga termino sa mga tinudlo co-terminus ngadto sa appointing authority o mahimong putlon sa mayor ang serbisyo sa gitudlo gumikan sa balidong rason. (PAC)