MGA non-teaching personnel sa Talisay City College (TCC) nipagawas og manifesto nga nagsaway ni Mayor Johnny “JVR” delos Reyes human giputol na ang ilang serbisyo sukad niadtong Hunyo 16.
Nasayran nga niadtong Hunyo 16 si JVR nipagawas nag kamandoan nga nagputol sa serbisyo sa tanang non-teaching personnel ug sila gimandoan nga motugyan sa tanang mga school properties, record ug uban pa ngadto sa bag-ong officer-in-charge (OIC) president sa TCC nga si Dr. Joseph Sol Galleon.
Sa ilang manifesto, ilang gibutyag nga way katungod ang mayor nga motaktak kanila bisan pag kini maoy chairman sa board of trustees sanglit ang TCC natukod man pinaagi sa ordinansa.
Matod nila nga sa ordinansa wa maghatag og katungod sa mayor ang pag-hire ug pag-taktak ni bisan kinsang kawani sa TCC.
Apan, nasayran nga ang mga non-teaching personnel, usa ka job order gidestino lang sa TCC aron makatabang sa pagpadagan sa tunghaan.
Sa 29 ka mga non-teaching personnel nga nipirma sa manifesto miingon nga labaw nilang gisakitan tungod kay hangtod karon wa pa sila masuweldohi sukad niadtong Enero ning tuiga hangtod nga nahuman nalang ang ilang kontrata.
Nasayran, nga ang kontrata sa mga non-teaching personnel kutob nalang niadtong Mayo sa miaging buwan apan na-extend kinig 15 ka adlaw.
Apan, daan nang mipaslig ang mayor ug ang bag-ong nilingkod nga OIC nga si Galleon nga masuweldohan ang mga kawani. (DRT)