Patubig prayoridad ni Caburnay

ANG suliran sa panubig sa lungsod sa Alcantara ang usa sa mga prayoridad sa bag-ong nanumpa nga mayor nga maoy nihulip sa namatay nga mayor nga si Fredo Cañete.

Si Mayor Beatriz Caburnay, bise mayor ni Cañete, ang nihurar atubangan ni Gob. Hilario Davide III sud sa buhatan niini sa Kapitolyo uban sa iyang bana.

Ang iyang bise mayor nga si Fritz Lastimoso, nag-unang konsehal sa lungsod, nanumpa usab og apil, kauban ang iyang inahan ug amahan.

Sila si Bise Gob. Agnes Magpale ug Provincial Board (PB) member Peter John Calderon ang nisaksi sa oath taking kagahapon.

Si Caburnay niingon nga iyang paninguhaon nga mahuman ang nasugdang mga proyekto ug programa sa namatay nga mayor ug mapun-an usab kini kon unsa pa ang gikinahanglan sa ilang lungsod.

“Maninguha ko nga pagka mayor nato nga adunay makita ang katawhan sa Alcantara. Malipay sad sila nga aduna sad koy agi nga atong paninguhaon kutob sa atong mahimo,” saad sa bag-ong mayor sa lungsod sa pakighinabi sa mga tigbalita.

Usa sa iyang hatagan og prayoridad ang panubig sa ilang lungsod tungod kay matod niya lisod ang panubig tungod kay mapawong usahay ang supply niini.

Siya nipasalig nga mangita silag tinubdan sa tubig nga maka-supply sa tanang siyam ka mga barangay sa lungsod.

“So maninguha mi nga aduna gyuy mahimo nga tubig. Mangita mi og dako nga source para makahatag sad mi og tubig sa among mga kaigsuonan,” dugang pasalig ni Caburnay.

Sa pagkakaron, gikan sa spring ang ilang tinubdan sa tubig ug dili kini paigo nga supply alang sa tibuok nilang mga barangay.

Sa pangutana kon kinsa ang mohulip ni Lastimoso pagka konsehal, si Caburnay niingon nga wa pa nila kini mahisgoti.

Apan, si Davide nipasabot nga ubos sa Local Government Code, ang One Cebu nga maoy partido nga gidala ni Lastimoso sa niaging piniliay niadtong 2013 ang adunay katungod nga mo-nominate og ihulip sa nabakanteng puwesto sa konseho.

Si Cañete gikatakdang ilubong karong Hunyo 29, adlawng Dominggo, human mamatay niadtong Hunyo 18 sa pribadong tambalanan gumikan sa sakit sa kasingkasing. Siya namatay sa panuigon nga 69. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph