GIPAGAWAS sa Office of the Visayas-Ombudsman ang kopya sa Statement of Assests, Liabilities and Networth (SALN) sa siyam sa 16 ka mga tag-as nga opisyal sa Kapitolyo.

Sa partial nga listahan sa mga SALN nga gipagawas sa Ombudsman, nigawas nga si 6th district Provincial Board (PB) member Arleigh Sitoy ang labing adunahan.

Sa iyang gipanumpaan nga SALN, gideklarar ni Sitoy nga moabot sa P71.1 milyones ang iyang net worth sa pagtapos sa tuig 2013.  Nisaka kinig P2.4 milyones sa iyang P68.7 milyones nga networth niadtong tuig 2012.

Moabot sa P68 milyones ang real properties ni Sitoy nga naglakip sa iyang kabtangan sa Cordova ug Lapulapu City, house and lot sa Leyte ug condo unit sa Mandaluyong City.

Gideklara usab niya ang moabot sa P5.3 milyones ang iyang personal properties. Lakip niini ang usa ka milyon nga kantidad sa appliances gikan sa tuig 1998 hangtud sa 2013. Moabot sa P1.8 milyones ang balor sa mga alahas niini, usa ka milyon nga balor sa mga libro ug sakyanan nga balor P1.5 milyones.

Sa kinatibuk-an, moabot og P73.3 milyones ang assets ni Sitoy apan tungod sa iyang liabilities nga P2.2 milyones anaa nalang sa P71.1 milyones ang iyang net worth. Ang iyang liabilities naglakip sa P2 milyones nga housing loan sa GSIS ug personal loan nga moabot sa P200,000.

Sa iyang SALN, lakip sa gideklarar ni Sitoy nga iyang mga paryente nga anaa usab mag-serbisyo sa gobiyerno, nga naglakip sa iyang amahan nga si Cordova Mayor Adelino Sitoy, iyang uyuan nga si Kapitan Celedonio Sitoy sa Gabi, Cordova, igsuon nga si Mary Therese Chu, kinsa bise mayor sa Cordova ug ig-agaw nga si Ximgil Sitoy nga konsehal sa Cordova.

Sa laing bahin, ang presiding officer sa Hunta Probinsiyal, Bise Gob. Agnes Magpale, nitalag P57.4 milyones nga networth. Ang iyang P56.7 milyoness nga networth niadtong 2012, nisakag P650,000.

Siya ang ikaduhang labing adunahang opisyal sa lalawigan.

Dunay mga personal properties nga naglakip sa bank accounts, kwarta nga cash, furniture, alahas, investment, company shares ug uban pa si Magpale nga moabot sa P39.6 milyones. Duna usab siyay mga luna sa Nueva Ecija, Cebu City, Danao City, Manila ug Tuburan.

Way gideklarar nga liability ang bise gobernador.

Ikatulo nga dunay labing dako nga net worth mao si PB member Gigi Sanchez. Aduna siyay P46 milyones nga networth. May P35.8 milyones nga iyang real property ug P10.6 milyones ang iyang personal properties.

Nitala siyag P400,000 nga liability.

Sunod ni Sanchez, mao si PB member Alex Binghay sa iyang P24.1 milyones nga networth. Niadtong 2012, duna lay kapin sa P9 milyones nga networth si Binghay. Nisaka kinig P15 milyones.

Duna siyay gipanag-iyang building sa Gaas, Balamban, residential land sa mao gihapon nga dapit, 14 ka mga agricultural lands, appliances, mga furniture, sakyanan nga uban pa. Kining tanan, mokantidad og P28.6 milyones.

Apan, duna siyay P4.5 milyones nga liability nga naglakip sa loan sa banko, loan sa cooperative ug uban pa.

Si PB member Peter John Caalderon maoy nagsunod kang Binghay sa iyang P15 milyones nga networth. Niadtong 2012, anaa kini sa P13.2 milyones.

Sunod kang Calderon si Gob. Hilario “Junjun” Davide III. Aduna siyay P14,932,749.19 nga net worth. May P4,482,409.00 nga liabilities si Davide hinungdan nga anaa nalang sa P19.4 milyoness ang iyang total assets. (AZDL)