Konseho sa siyudad sa Talisay di na mopatawag sa COA: Villarante

KONSEHO sa dakbayan sa Talisay dili na mohimo og lakang aron ipatawag ang kadagkuan sa Commission on Audit (COA) nga nakabase sa Talisay nunot sa ilang report sa Black Pearl Security Agency.

Si Bise Mayor Romeo Villarante miingon nga una sa tanan ang maong kontrata wala moagi sa konseho ug wala usab mangayo og pagtugot ang mayor sa konseho sa dihang mipirma kini og kontrata niadtong Marso ning tuiga.

Usa ka Vicente Cabrera ang mipasakag kasong kriminal ug kasong administratiba batok ni Mayor Johnny delos Reyes, iyang anak nga maoy city administrator ug chairman sa Bids and Awards Committee (BAC) John Yre delos reyes ug mga lain pang opisyal ngadto sa buhatan sa Visayas Ombudsman base sa taho sa COA nga nagkuwestiyon sa serbisyo sa Black Pearl Security Agency.

Hinuon, ang mayor ug anak niini niingon nga wala sila mahadlok sa kaso ug andam kini nilang tubagon.

“As preventive measures against violations, council already passed resolution creating internal audit team upon recommendation sa COA,” matod ni Villarante sa Sun.Star Superbalita. (DRT)