DUGANG tulo ka mga mayor sa One Cebu ang ningtapon na sa Liberal Party (LP) ni Presidente Benigno Aquino III ug gikatakdang manumpa karong buntag didto sa kaulohan.

Si Cebu Governor Hilario Davide III, provincial chairman sa LP-Cebu, niila sa mga mayor nga sila si Madridejos Mayor Salvador de la Fuente, Sta. Fe Mayor Jose Esgana ug Moalboal Mayor Inocentes Cabaron ang bag-ong mga sakop sa partido.

Ang gobernador niingon nga si Senate President Franklin Drilon, usa sa mga haligi sa LP, ang mopahural sa maong mga mayor sa national headquarters sa partido sa Quezon City karong alas 10 sa buntag.

Ang mga mosaksi sa kalihokan mao sila si 2nd District Rep. Wilfredo Caminero, Provincial Board Member Peter John Calderon ug Association of Barangay Council (ABC) Federation president ug PBM Celestino “Tining” Martinez III.

Ang maong mga opisyal pulos sakop sa LP.

Si Bise Gobernador Agnes Magpale, kinsa usa usab ka LP, dili makatambong sa kalihokan.

Si Davide nagkanayon nga subra na sa katunga sa gidaghanon sa mga mayor sa lalawigan sa Sugbo ang kapartido na nila sa LP ug nadugang ang tulo ka mga mayor nga bag-o lang nagpasakop.

Ang gobernador wa hinuon motug-an kon aduna pa bay laing mayor ang mobalhin sa ilang partido.

“I don’t want to speculate on this. Ang klaro tomorrow there are three mayors who will be joining the Liberal Party,” namahayag si Davide atol sa press conference sa Kapitolyo kagahapon. (SCG)