TULO ka mga suspek sa pagpusil-patay sa Sugbuanon nga magpapatigayon nga si Richard Lim King sa dakbayan sa Davao, nasikop sa kapulisan niadtong Dominggo.

Giila ang tulo nga sila si Rommel dela Cerna, 39, usa ka police asset; Paul Dave Colina Labang, triggerman; ug Rodel dela Cerna, drayber sa motorsiklo. Ang tulo giingong pulos kawani sa Laud Firing Range sa Maa, dakbayan sa Davao.

Si Chief Inspector Jade Clamor, information officer sa Special Investigation Task Group King nga nahinabi sa Sun.Star Superbalita, nibutyag nga niadtong Dominggo namatikdan ang presensya sa usa ka tawong armado sa Barangay Maa.

Matod ni Clamor, nihaom ang dagway sa suspek base sa artist sketch ug sa dihang gipaubos sa police line-up kagahapon sa buntag positibo kining gitudlo sa lima ka saksi.

"So gipailalom siya sa police line-up with the witnesses, and he (Labang) was positively identified by five witnesses, katung witnesses nga naa mismo sa pangkahitabo," matod ni Clamor.

Dugang niya nga gipaubos na sa imbestigasyon ang suspek aron pag-ila sa mastermind sa krimen ug ang pagpaubos sa ballestic examination sa nakuha nga armas gikan sa iyang posisyon.

Si Rommel niingon nga niadtong Hunyo 12 sa hapon, ang mamumuno nakadawat og tawag gikan sa opisyal sa kapulsan nga nagmando kaniya sa pagpanguta ni Richard King sa iyang buhatan sa Vital C sa Barrrio Obrero.

Matod niya, siya maoy unang nangita kang King sa sulod sa Vital C building. Dihang nakompirmar nga si King naa sa suilod, ang mamumuno nga si Labang nisulod ug gipusil ang biktima sa ulo.

Si Labang nisibat uban sa ikatulong sa suspek nga si Rodel sakay sa motorsiklo.

Matod ni dela Cerna, ni­adtong adlawa lang si­ya nakadiskubre sa pagkatawo sa biktima.

Ang mamumuno ug drayber sa motorsiklo gitanggong karon sa Intelligence Section of the Davao City Police Office (DCPO) samtang, si Rommel gilain sa pagsulod og bilanggoan.

Ang awtoridad nagdumili sa pagpakighinabi sa media laing duha ka suspek. Samtang, ang mga imbestigador hilom ug wala mobutyag sa utok nga opisyal sa kapulisan nga nagmando sa krimen.

Usa ka dili kompirmadong taho nagkanayon nga usa ka opisyal kini sa Police Regional Office (PRO)-Davao.

Apan ang mga opisyal sa PRO-Davao nagdumili sa komentaryo sa taho.

Wala pa matino kon asa ihatag ang P1.3 million reward sa pagkasikop sa tulo ka mga suspek.

Si King, tag-iya sa Crown Regency Group of Hotels, gipusil-patay sulod sa Vital C Building sa dalan Sobrecary, Davao City sa 6:45 sa gabii niadtong Hunyo 12.

Niadtong Miyerkules, Hunyo 18, si King gilubong na sa Cebu Memorial Park sa Barangay Banliad, dakbayan sa Sugbo. (DRT/Sun.Star Davao/Sunnex)