DAGHAN na ang krimen nga nasulbad sa Davao City Police Office (DCPO) ubos ni Sr. Supt. Vicente Danao, Jr. kinsa mipakusog sa kampanyang "Isumbong mo kay CD".

Dayag kaayo ang iyang tarpaulin sa nagkadaiyang lugar sa siyudad nga dunay cellphone number nga sumbongan sa mga Dabawenyo.

Pinaagi niini, usa sa nasulbad nga krimen mao ang pagpatay sa negusyanteng si Richard Lim King kay sa maong hotline misumbong ang usa sa mga suspek.

Kon wa pa ang nagbansiwag nga numero sa atong buotan, kugihan ug maalagarong direktor, labing seguro wa gyud nakakontak ang suspek. Busa, Sir, saludo ko sa mga reporma nga gipatuman nimo sukad miabot ka sa DCPO.

Apan natibhangan kini dihang nasayud ko nga dunay tulo ka reporters sa Sun.Star Davao, Mindanao Times, Edge Davao nga imong gilabhan pagkasaba.

Nahitabo kini sanglit nabalita ang pangalan sa giingon nga persons of interest sa kaso ni King nga unang napatik sa progress report sa DCPO.

Hinuon, daling nangayo og pasaylo si Danao human gibatikos siya sa mga sakop sa media.

Apan tungod sa nahitabo, ug tingali natangdog ang garbo, gimandoan ni Danao ang Investigation Detection and Management Branch (IDMB) nga di na magbutang og spot ug progress reports alang sa media.

Buot ipasabot nga moadto na ang mga reporters sa 12 ka police stations. Di kaha panimalos kining imo, Sir, sa print media?

Alang nako, lisud kining himuon matag adlaw kay layo kaayo ang presinto sa Marilog, Calinan, Baguio, Bunawan, ug Paquibato Districts.

Di praktikal ang imong gisugyot, Sir! Ug daw wa kini nahisubay sa gimando ni PNP Director General Allan Purisima nga himuong transparent ang tanang yunit sa kapulisan sa nasud.

Kon duna kay kasuko sa pipila ka sakop media, Sir, ako nangalyupo nga ayaw ihikaw sa mga Dabawenyo nga masayud sa panghitabo sa siyudad pinaagi sa media.

Ug kon, sa imong tan-aw nasayop ang media, mas maayo tingali nga inyong resolbahon nga di gyud mogawas ang mga highly confidential reports sa inyong level pa lamang.

Ang di patas nga pagtratar sa katawhan lakip na ang media, subay sa akong nakat-unan sa public administration, usa kini ka kalapasan sa Republic Act 6713 kun Code of Conduct and Ethical Standards for Public Officials and Employees.

Angay kining rebyuhon ninyong mga opisyales ug empleyado sa gobyerno aron di magpasuwabi ang 'ego' kaysa tinuod nga esensya sa serbisyo publiko.

Sa dagan sa kaso ni King, kinahanglan nga transparent karon ang DCPO ibalina nga nalambigit dinhi si Police Supt. Leonardo Felonia aron mapapas ang katahap sa katawhan.

Hinaut nga inyong ipakita nga dunay lawom nga imbestigasyon aron molutaw gyud ang kamatuoran.