DAGHAN ang nagmulo sa bug-at nga silot ug taas nga multa sa mga makalapas sa balaod trapiko nga gipatuman sa Land Transportation Office (LTO) ug sa Land Transportation Franchising and Regulatory Board (LTFRB) sugod niadtong milabay nga semana.

Usa sa mga mipiyait mao ang mga operator sa mga bus company ug mga trak-de-karga, apil na ang pipila ka mga indibiduwal nga nagbaton og mga depasaherong dyip.

Didto sa kaulohan, daghang mga bus ug trak ang wala makadagan kay hadlok nang madakpan kay nasayran nga mga kolurum diay ang ilang mga behikulo.

Nangayo sila og lugway aron nga makakuha una og mga legal nga prangkisa ug rehistro kay paralisado na ang ilang mga biyahe.

Tungod sa kabug-at nga silot ug multa nga moabot ngadto sa P1 milyon, ug pagkatanggong sa ilang behikulo og tulo ka mga bulan, mga bus ug tracking company wala na mipadagan sa mga bus ug trak nga kuwestiyonable ang prangkisa ug rehistro.

Mao ning giingon nga "tapos na ang mga masasayang araw ninyo".

Naa ra man diay ni. Kay kaniadto yano-yanohon ra man nila ang multa kay barato ra kaayo. Dali rang bayran tungod kay mas dako man ang gikita inay sa penalty kon madakpan.

Nagpakita lang kini nga epektibo ang bag-ong balaod sa LTO ug LTFRB. Kay kon gaan ra og silot ug gamay ra og multa, di man mahadlok ang mga operator ug tag-iya og mga trak.

Suma god, hagbay ra nang nagdinakpanay ang mga sakop sa LTO sa mga kolurom nga behikulo apan hangtud karon naa pa man gihapoy nagdagan sa kadalanan.

Apan pinaagi sa maong balaod, naglaum kita nga unta makunhoran na ang mga kolurom nga mga sakyanan, kon di man mawagtang sa kadalanan.

Kay kon hadlok ang mga dagko, seguradong hadlok pod ang mga gagmay sa maong balaod.