DAVAO CITY – Giingon nga wala naapil ang mga Indigenous Peoples (IPs) sa kabukiran sa programa sa Department of Social Services and Development (DSWD) nga Pantawid Pamilyang Pilipino Program kun (4Ps).

Kini ang gibutyag ni 2nd District Councilor Danilo Dayanghirang atol sa pakighinabi kaniya sa mga tigbalita kagahapon.

Giingon ni Dayanghirang nga migula kini nga impormasyon human masayran sa gipahigayong survey sa militar sa kabukiran.

Sumala ni Dayanghirang nga kompleto na ang resolusyon aron hangyuon sa DSWD nga iapil ang katawhan nga anaa nagpuyo sa mga hilit nga kabukiran sa siyudad.

"I filed the resolution requesting the DSWD to include the IPs in the 4Ps program because one of the outputs of the survey of the military, one of the complaint of these residence, the IPs in the area wala sila maapil sa programa sa 4Ps," ingon ni Dayanghirang.

Gihingusgan ni Dayanghirang nga maapil sila sa maong programa diin bugtong problema niini mao ang pagpatala kanila gumikan wa sila maabot sa dapit.

"Makita nimo nga pobre ni sila, lagyo sila, and I think the problem is about documentation. Dapat iapil gyud ang IPs," sulti sa konsehal.

Giingon niini nga nasayud na ang DSWD sa maong problema ug iyaha na lamang kining susihon subay sa pasalig sa DSWD nga sakaon ang kabukiran aron ilista sila. (Jeepy P. Compio)