NORTH COTABATO - Miabandona sa ilang trabaho ang Joint Ceasefire Monitoring Team ug wala gipapahawa sa ilang puwesto.
Kini mismo ang pamahayag sa Kidapawan City Disaster Risk Reduction Management Council.
Gibutyag ni CDRRM Head Psalmer Bernalte nga walay abiso ang paghawa sa JCMT nga maoy nagpatunghay sa seguridad ug kalinaw sa Sitio Nazareth Barangay Amas, Kidapawan City.
Ang JCMT gilangkuban sa MILF, militar ug kapulisan nga namugna basi sa nasabutan sa Crisis Management Committee sa NorCot nga gipangulohan ni Governor Emmylou "Lala" Talino Mendoza uban si Kidapawan City Mayor Joseph Evangelista.
Matud ni Local Monitoring Team Head Jabib Guiabar nga mihawa ang Joint Ceasefire Monitoring Team gumikan wala gituman sa LGU Kidapawan City ang ilang nasabutan kabahin sa accommodation, pagkaon, tubig, ID, cellphone ug load.
Diin mao kini ang usa sa mga hinungdan nga gi-abandona sa JCMT ang ilang trabaho.
Namugna ang JCMT aron unta tahasan nga magbantay sa Sitio Nazareth, Barangay Amas aron dili na subling moulbo ang kagubot sa panag-ilog sa yuta nga gipanag-iyahan sa Central Mindanao Integrated Agricultural Research Center (CEMIARC) sa Department of Agriculture.
Diin niadtong unang semana sa Hunyo nagka-engkuwentro ang grupo sa mga Kristiyano ug Muslim, diin tulo ang napatay ug duha ang naangol.
Giklaro ni Bernalte nga wala magkulang ang lokal nga panggamhanan sa Kidapawan kanila tungod kay gitukoran og outpost ang JCMT sa siyudad apil na ang ilang matulugan ug kasilyas.
Nasabutan nga P50 mil ang igahin sa Provincial Government ug P20 mil nga food items gikan sa CEMIARC.
"Halos lahat na lang ng tulong ay mula sa City LGU kaya wag nilang sabihin na di ito tinupad ng Kidaapwan City LGU unfair yun," suma ni Bernalte.
Gitakda nga magpulong ang Crisis Management Committee aron hisgutan ang naasoy nga problema aron dili na mograbe pa ang kagubot sa Sitio Nazareth. (Edgar Fuerzas)