STA. CRUZ, Davao del Sur - Subling midangop sa kapulisan ug Department of Social Welfare and Development-Davao (DSWD 11) ang ginikanan sa duha ka mga estudyante nga giingong gipa-masturbate sa ilang maestro.

Ang maestro gitago sa pangalang Dennis, 40, grade 5 science teacher sa elementarya sa Astorga sa Sta. Cruz, Davao del Sur.

Si Dennis giakusahan nga nagpa-masturbate nila alyas Rolly, 12; ug Bodong, 12, pulos molupyo sa Barangay Astorga.

Subay sa impormasyon nga nakalap sa Superbalita gikan sa amahan sa usa sa mga biktima, giingon nga bulan sa Agosto 2013 nahitabo ang unang pagpa-masturbate sa maestro.

Giingon sa duha nga ika-siyam ka higayon na kining gipahimo sa maestro kanila sud sa comfort room sa classroom.

Sumala ni Rolly ngadto sa iyang amahan nga ulahing nahitabo ang pagpa-masturbate kanila niadtong Enero 9, 2014.

Si Bobong nagsulti sab sa iyang inahan sa gipahimo sa maestro butang nga misumbong na sila sa kapulisan.

Gipatawag ang maestro sa principal, apan gilimod niya ang pasangil.

Si alyas Mario, amahan ni Rolly, dihang nahinabi sa Superbalita kagahapon sa udto, nagsulti nga miadto ang abogado sa maestro sa ilang balay.

"Nianhi ang iyang abogado ug niingon nga undangon na ang pagreklamo namo kay kalas-kalas ra og oras, tapos masamok na daw kung di mi moundang," sulti ni Mario pinaagi sa telepono.

Gidugang sa amahan nga nagpatabang na sila sa buhatan sa DSWD sanglit wala silay kwarta nga ikagasto sa pagpasaka og kaso batok sa maestro.

Niadtong Lunes, pormal nga gipasaka sa mga ginikanan sa ang kaso batok sa maestro ngadto sa Office of the Ombudsman Mindanao.

"Napasaka na namo sa Ombudsman ang reklamo. Didto nami sa DSWD nagpatabang aron mahatagan og leksyon ang maestro," dugang ni Mario.

Gisulti sab niya nga daw walay gihimong aksyon ang Department of Education-Davao (DepEd 11) sanglit padayon gihapon nga gipatudlo ang maestro bisan dunay reklamo.

"Walay aksyon ang DepEd. Giingnan lang man kaha mi sa District Office nga hulaton lang ang mga abogado, tapos hangtud karon mora'g natabunan na ang isyu," panapos ni Mario.

Samtang gisuwat kining balita, wa pa makuha sa Superbalita ang pahayag sa DepEd labot sa maong isyu. (Jeepy P. Compio)