TULO ka mga babaye ang kasamtangang gipriso sa Maharlika Detention Cell human kini giingong nasapon nga nangawat sa usa ka dakong mall ning siyudad mga alas 4:00 niadtong Lunes.

Ang mga suspetsado naila nga sila Van, 23; Ann 26, minyo, ug usa ka 15 anyos nga taga Zone I- Bantiles, Bugo ning siyudad sa Cagayan de Oro.

Gidala ni Amor Jabutay, 26, Supervisor sa giingong mall uban sa mga kauban niini ang tulo ka mga suspetsado human kini masapon nga gisulod sa mga dala nga sling bag ang kinuha nga baligya.

Nakuha gikan kang Van ang mga butang nga mobalor og P2,799 nga naglangkob sa whole dress - P560, usa ka pares sa pambata nga sinina - P126, usa ka pares sa leggings - P279, usa ka tube nga sinina - P305, usa ka pares sa echo brand nga sinina - P100, duha ka sarong nga itom - P590, usa ka spaghetti dress - P149, usa ka blouse - P205, blouse nga JP Danganan Brand - P210, laing spaghetti dress - P149, ug usa ka pares nga sinina nga mokantidad sa P126.

Samtang nakuha usab gikan kang Ann ang mga nagkalain-laing nga mga sinina nga mobalor og P796 nga naglakip sa sa usa ka pambata nga mokantidad ug P600 ug usa ka whole dress stripe nga tag P196.

Ang gibitbit sa usa ka 15 anyos usab mobalor og P1,668 sulod niini ang lady’s short pants - P189, laing short pants nga mokantidad ug P199, duha ka lady’s dress - P430, leggings - P390, sleeveless - P255, ug usa ka see thru nga mokantidad sa P205.

Gisaysay sa usa ka polis sa Police Station 5 (PS5) sa Macabalan nga gituohang planado ang maong pagpangawat tungod kay duna man kini dala nga mga bag.

Nibutyag pa kining 15 anyos nga sayon lamang mangawat sa maong sumala sumala sa iyang mga higala.

Samtang ang igsoon ni Ann nibutyag sa Sunstar Superbalita nga dili kini siya makatuo nga buhaton kini sa iyang igsoon tungod kay bag-o lang kini gipadalhan og kwarta sa iyang bana nga tua sa gawas sa nasud.

Nadakpan kining mga suspetsad sa Gate 2 Exit door sa maong Mall ug nakuha sa ilang posisyon ang maong mga butang.

Giandam na ang pagpasaka og tukmang kaso batok sa mga suspetsado kong dili kini maareglo tali sa tagdumala sa maong mall.