PATAY ang usa ka lalaki human gipusil sa nakamotorsiklo nga suspetsado mga alas 4:10 sa kaadlawon kagahapon sa dalan J.R Borja-Capt. Vicente Roa ning siyudad sa Cagayan de Oro.

Ang biktima gibanabang nag-edad og 20 ngadto sa 25 anyos, nagsul-ob og puti nga T-shirt, long pants, ug naka-jacket.

Sa inisyal nga imbestigasyon sa Police Station 2 (PS2) sa Cogon, nasuta nga sakay sa multi-cab Balulang Liner ang duha ka mga biktima ug pagkanaog sa maong dapit anaa ang duha ka mga lalaki nga nagmotorsiklo ug naka-bonnet.

Sumala sa nakasaksi nga buot pasakyon sa duha ka mga nakamotorsiklo ang duha ka mga lalaki apan nidagan kining usa ka lalaki samtang ang laing usa ang nisakay.

Human sa ginukdanay, giingong nibalik sa maong dapit ang usa ka lalaki diin kini gipusil sa suspetsado.

Usa ka Christina Bacho, 62, nga taga Camaman-an ning siyudad ug nanag-iya og kapehan sa dapit nibutyag sa Sun.Star Superbalita nga tungod gyud sa iyang pwesto nga lamesa natumba ang biktima ug payong lang naka-ali sa natulog usab niya nga anak niadtong higayona.

Ang biktima nakaangkon og samad pinusilan sa iyang tiyan ug ulo, hinungdan nga gidali kini pagdala sa Maria Reyna Hospital apan human sa pipila ka oras nakabsan kini sa iyang kinabuhi.

Gibutyag ni Police Inspector Dominador V. Orate Jr., deputy station commander sa PS2, nga wala pa nila masuta ang hinungdan sa pagpamusil.

Nakuha gikan sa crime scene ang bala sa gituohang nga kalibre 5.56 M16.

Gideklara nga nakabsan na ang biktima sa iyang kinabuhi mga alas 6:52 sa buntag ug gidala na ang patay nga lawas niini sa Bollozos Parlor alang sa pagahimuon nga medico-legal.

Samtang wala pa masayri ang nahitabo sa kauban sa biktima nga gisakay sa mga suspetsado sa motorsiklo.