GIKASUKO ni Cagayan de Oro City Mayor Oscar Moreno ang paghimakak ni Bise Mayor Caezar Ian Acenas sa giingong pagbalibad niini sa mga investor sa siyudad sa Cagayan de Oro.

Gitawag niining walay uwaw si Acenas human miingon si Acenas nga nagboutbout ug nagbinakak si Moreno atol sa speech niini sa Charter Day ug Flag ceremony niaging semana.

“Ako pa hinuon ang ginganlan og bakakon?” kini ang pamahayag sa mayor sa paghimakak ni Acenas nga iyang gibalibaran ang mga investor tungod kay dili sila in good terms ug daw giduso hinuon niini ngadto sa Gobernador sa Misamis Oriental.

Matud ni Moreno nga dili siya makatuo nga magbakak si Acenas ug mo-deny nga wala niini balibari ang mga investor nga daw doul man kini sa Ginoo.

Apan si Acenas nisulti nga dili niya binuhatan nga moabog sa mga investor gani iya kining giingnan nga ipaadto sa buhatan sa Mayor ug unta dili magbinakak ang mayor.

Dugang ni Moreno nga ang gihimo ni Acenas nagsamot hinuon sa pagpakaulaw sa siyudad gani daw dihang iyang nahinabi ang mga investor nga maoy misulti kaniya nangayo siya og depensa sa giingong iresponsableng pamahayag ni Acenas.

Kahinumduman nga gibutyag ni Moreno niadtong Charter Day nga gikadismaya niya pag-ayo ang pagbalibad ni Acenas sa mga investor tungod kay kaaway sila ug giduso hinoun kini didto sa probinsya.

Hinuon daw nangayo na siya og apology sa mga investor sa iresponsableng pamahayag ni Acenas. (SVB)