ARESTADO ang usa ka gitouhang lider sa usa ka relihiyosong grupo pinaagi sa gisilbing warrant of arrest nilabay'ng adlaw diha sa Sitio Sulog, Barangay Halapitan, lungsod sa San Fernando, Bukidnon.

Ang mga personahe sa San Fernando Police Station ang misikop sa suspetsado nga mao si Felipe R. Rivera, 53, minyo, giingong illiterate ug leader sa Philippine Reformation Catholic Church nga nahimutang sa maong dapit.

Duha ka mga kasong pagpanglugos ang giatubang niini diin pinaagi sa warrant of arrest nga giisyu ni Isobel G. Barroso sa RTC branch 8, siyudad sa Malaybalay.

Ang maong mga kaso mao ang CC # 24847-13, 24849-13 ug 24850-13 diin tulo ka ihap ang giisyu niadtong Octokbre 29 niaging tuig ug laing CC # 22856-12 to 22870-12 diin dunay unom ka ihap.

Walay girekomendar nga bailbond sa kaso nga giatubang niini diin ang mga biktima nag-edad og 11 anyos ngadto 15 anyos kinsa sagad mga miyembro sa maong relihiyosong grupo nga giingong kanunay nga gabiktimahon niini ug daw lugoson.

Ang suspetsado ning panahona ang detinado sa San Fernando Police Station. (SVB)