GIPANGULOHAN ni Dennis Orcollo ug sa mga kanhi kampiyon sa Sun.Star Superbalita 9-Ball Challenge nga sila si Antonio “Gaga” Gabica ug Elmer Haya ang pito ka mga Pinoy nga wala’y pildeng nakasulod sa round-of-64 knockout stage kagahapon sa ikatulong adlaw sa WPA World 9-ball Championship sa Doha, Qatar.
Nakompleto ni Ocollo ang iyang tulo ka mga tahas sa winner’s bracket sa Group 7 human niya gibuntog si Ko Ping Chung sa Chinese Taipei, 9-6.
Si Gabica, kinsa lumad nga taga Lapu-Lapu City, miharos sab sa iyang mga duwa sa winner’s bracket sa Group 4 pinaagi sa 9-3 nga kadaugan batok kang Michel Bartol sa Crotia.
Samtang perpekto sab si Haya sa winner’s bracket sa Group 16 human niya gipatapsingan si Artem Koshovyi sa Ukraine, 9-8.
Ang ubang mga Pinoy nga nakakompleto sa ilang tahas sa winner’s bracket mao sila si Carlo Biado, Raymund Faraon, Johann Chua, ug Jeffrey de Luna.
Gipukan ni Biado si Tom Storm sa Sweden, 9-7, sa Group 8, gilupig ni Faraon si Young Hwa Keong sa Korea, 9-7, sa Group 9, gimakmak ni Chua si Lo Li Wen sa Chinese Taipei, 9-6, sa Group 13, samtang gilampornas ni De Luna ang kababayang si Israel Rota, 9-3, sa Group 14.
Gawas kang Rota, ang ubang mga Pinoy nga napilde ug natagak sa loser’s bracket mao sila si Warren Kiamco ug Elvis Calasang.
Naglupig kang Kiamco, kinsa usa ka lumad nga Sugbuanon, mao si Niels Feijen sa Netherlands, 6-9, sa Group 6 samtang ang nagpukan kang Calasang mao si Wu Jiaqing sa China, 7-9, sa Group 10.
Hinuon aduna pa’y poruhan sila si Rota, Kiamco, ug Calasang nga makaabante sa knockout stage kon modaog sila sa nahabilin nilang mga tahas sa loser’s bracket.
Ang laing mga Pinoy nga padayong nagpakabuhi sa loser’s bracket mao sila si Efren “Bata” Reyes sa Group 9, Lee Van Corteza sa Group 16, Francisco Felicilda sa Group 12, ug Ramil Gallego sa Group 4. (ESL)