AKONG tan-aw, giuna nga pag-apiki sa administrasyon ni Presidente Aquino (PNoy) ang mga lig-ong haligi sa oposisyon tungod ug alang sa ilang pamulitika. Gumikan niini, nitumaw ang mga pangutana: mao ba kini ang tinuod nga “ tuwid na daan”?
Kini sila si Senador Bong Revilla ug Jinggoy Estrada gituhoan nga posibling modagan alang sa taas pa nga katungdanan. Gani, nipahibawo na si Revilla bisan og napriso na siya karon magpadayon ang iyang tinguha sa pagdagan unya sa pagka presidente sa Pilipinas.Wa siya mauwaw?
Samtang si Senador Juan Ponce Enrile, dunay dakong impluwensya. Mao bitaw niingon si Senador Santiago ang higpit nga kaaway ni Enrile, bisan tiguwang na “may asim pa.”
Dako hinuon ang atong pagtoo nga kini sila si Revilla, Estrada ug Enrile, may kalambigitan sa P10 bilyones nga pork barrel scam ni Janet Lim Napoles. Sila diay si Senador Loren Legarda, Chiz Escudero ug mga kauban sa Liberal, diba nalambigit man kini sila sa pagpangawat ni Napoles.
Pamulitika sa Liberal
Para nako di nasab maayo ang gihimo sa administrasyon. Kay klaro na ang ilang pagpangandam alang sa 2016, presidential election. Delikado gani hinoon ug magkagubot tungod niining ilang sayop nga formula sa pulitika.
Kasong graft lang ang gipasaka nga kaso batok nila ni DBM Undersecretary Relampagos ug TESDA director Joel Villanueva. Asa naman diay si DBM Secretary Butch Abad, ang giingon ni Napoles nga maoy nagtudlo kaniya.
Mora man hinuon ug ila lang gisakripisyu ang ilang mga sakop sa gabinete aron pagpatuo sa mga tawo nga wala silay gipili sa mga gipasakaan ug kaso.Kanang tinooray gyud unta nga pagsubay sa “tuwid na daan” ang ilang gihimo.
Sa kamaldito sa Liberal, ang mga sakop ug kaalyado sa UNA party ni Bise Presidente Jejomar Binay maoy nangasukamod. Apan inig bali unya niini, ang napriso maoy makagawas ug ang naa sa gawas mao na sab unya ang mapriso.
Samtang niining pagka priso ni Jinggoy delikado hinuon nga mosamot kalig-on ang puwersa ni Binay kay si Manila City Mayor Erap Estrada, ang amahan ni Jinggoy, posibling maoy himuong runningmate ni Binay.
Tan-awa, giapiki sab karon si Erap tungod sa posibling pagkatangtang sa katungdanan sa pagka mayor tungod sa disqualification case nga gipasaka sa usa ka abogado. Dunay pagduda nga may kalambigitan niini ang administrasyon.
Si ER Ejercito, pag-umangkon ni Erap ug ig-agaw ni Jinggoy, gitangtang sa Comelec sa pagka gobernador sa Laguna, sa kasong sobra ang paggasto sa kuwarta sa election sa panahon sa kampanya niadtong tuig 2012.
Karon gibuhi nasab pagbalik ang kaso ni Binay dihang mayor pa kini sa Makati. Kana si Binay di sab gyud hinuon na limpyo nga nag-alagad sa gobyerno. Gani matud pa nila “way pulitikong dili kawatan. Dugang pa nila, sakit raba nang kamatuoran.
efren_lonzon@yahoo.com,09156938444 / 09327380888