NAKASABOT na si Gobernador Junjun Davide hinungdan nga giputol ang temporaryong serbisyo sa Black Pearl Security Agency.

Pero si Talisay City Mayor Johnny "JVR" delos Reyes ang nagpadayon pa gihapon sa pagpaserbisyo sa Black Pearl. Gipasabot ni JVR nga maayo ang serbisyo sa Black Pearl.

Sa dokumento nga nakuha sa Commission on Audit (COA), nahibaw-an nga niadto lang Nobyembre 25, 2013 nakakuha og license to operate ang Black Pearl gikan sa Kampo Krame. Apan misugod na kini ug serbisyo sa Talisay niadtong Agusto sa miaging tuig.

Nangatarungan si JVR nga dinalian ang serbisyo sa mga guwardiya busa wala nila balibari ang tanyag sa Black Pearl nga mo-train og guwardiya nga pulos taga Talisay. Ug samtang wala pa nahuman ang ilang training, ang Talisay misuweldo kanila isip mga job order employees. Apan nganong ang Black Pearl man maoy gipa-train nga utro paman pud silang angay i-train? Nganong ipa-train man sa way licensya niadtong higayona?

Human sa training, nawagtang ang status sa ilang pagka job order employee ug nagserbisyo isip direktang mga guwadiya sa Black Pearl. Matud ni JVR nga duna say bidding ug ang Black Pearl ang midaog kay misibog sa bidding ang usa ka security agency.

Karon, si JVR, ang iyang administrator nga si John Yre ug mga sakop sa Bids And Awards Committee (BAC) ang nag-atubang ug kaso sa Ombudsman nga gipasaka gikan ni Vicente Cabrera.

Kasong kriminal ug administratiba ang ilang giatubang. Ang kasong administratiba mahimong makasuspenso ug makatangtang nila sa katungdanan.

Ang peligro mao ang kasong kriminal kay maghatod nila sa prisohan kung mamatud-an nga sad-an.

Nagduda si JVR nga ang iyang mga kaatbang sa politika ang utok sa ilang giatubang nga kaso. Natural nga mangita gyod og buslot ang ilang kontra aron maipit si JVR.

Ako nakaila sa kaligdong ug pagkamaayong tawo ni JVR. Gani ang mao man niyang mga hiyas ang nakapadaog niya sa katungdanan.

Pero basin ug may miabuso sa iyang pagkamaayong tawo. Dili ba kaha nasobrahan ra sa pagkamaikugon ang Mayor? Dili kaha iya rang mga hinanib ang niabuso sa iyang ka maayo?

Ang pagkamaayong tawo maayo kana nga hiyas apan isip amahan sa Talisay, angayang magbantay si JVR sa gustong mopalapala niya. Kinahanglan nga makamao nga motempo si JVR sa pagtando og ‘Yes’ ug sa pag-ingon nga ‘No’.

Maluoy kong JVR nga tungod sa pagkamaayong tawo, isayun-syon lang ug underground sa mga nagpalibot niya. Kana bang sa atubangan maayong modala ug ngisi ug liputon ka ug tampok sa kutsilyo sa imong bukubuko.

Pagbantay nila Mayor JVR kay basin ug gamiton ka sa ilang pangwarta.