MIHULGA ang “Twilight” star Kristen Stewart nga mokiha batok sa stand-up comedienne Joan Rivers gumikan sa gisuwat niini nga libro diin gihisgutan ang kontrobersiyal nga pakigrelasyon ni KStew ngadto sa minyo nga director nga si Rupert Sanders.

Si Sanders maoy director sa “Snow White and the Huntsman” diin si Kristen maoy usa sa lead star.

“Many stars only do one thing well.  Of course, the best one-trick-pony is Kristen Stewart, who got a whole career by being able to juggle a director’s balls,” tipik sa natala nga libro ni Rivers nga gi-ulohan “Diary of a Mad Diva.”

Tungod niini ang abogado sa aktres mipaabot sa mensahe ngadto sa kampo sa writer nga mosang-at sila og kasong defamation ilabi na nga sunod buwan mogawas na ang maong kontrobersiyal nga libro.

Apan giklaro sa 81 anyos nga komed­yante nga wala siyay labot kon unsay bation ni KStew kabahin niini sanglit wala siyay usbon sa unod sa iyang mga sinuwat.