MOBALIK sa sinugdanan sa pagpahigayon og bidding alang sa pagkuha og security agency ang kagamhanan sa lalawigan sa Sugbo.
Si Gobernador Hilario Davide III mideklarar og “failure of bidding” agi og pagtuman sa Section 41 sa Republic Act No. 9184 o Government Procurement Reform Act.
Kini human sa kontrobersiya nga nihamok sa bidding process human ang Kapitolyo temporaryo nga nikuha sa serbisyo sa Black Pearl Security Agency bisan og way notice of award ug kontrata.
“In light of the recent controversy involving Black Pearl Security Agency and in order to dispel all doubts, real or imagined, on the integrity of the Provincial Government’s bidding process, I have decided, as head ofthe procuring agency, to declare a failure of bidding” tipik sa desisyon sa gobernador sa iyang suwat ngadto sa Bids and Awards Committee nga pinetsahan og Hunyo 23, 2014.
Si Davide nibasura sa rekomendasyon sa Bids and Awards Committee nga ipaubos sa post-qualification evaluation ang Tactical Security Agency ug GDS Security Agency human na-disqualify ang BPSA pinaagi sa pagtuko og ad hoc Technical Working Group.
Si Provincial Administrator Atty. Mark Tolentino, bag-ong chairman sa BAC, niingon nga gusto sa gobernador nga ipakita ang transparency ug mawagtang ang mga pagduda bahin na sa pagkuha sa BPSA isip temporaryo nga mobantay sa Kapitolyo ug ubang mga pacilidad niini human napupos ang kontrata sa TSA niadtong Mayo 31.
Si Tolentino nagkanayon nga dunay katungod ang gobernador sa paghukom nga himuon ang rebidding isip maoy pangu sa procuring agency, ang Provincial Government.
Siya nipadayag nga tungod sa maong kalamboan malangay na usab ang pagkuha og bag-ong security agency apan paningkamotan nila nga madali kini pinaagi sa pag-revise sa terms of reference sa bidding.
Sa terms of reference, gusto ni Davide nga dili moabot og duha ka tuig ang kontrata sa kuhaon nga security agency sanglit taasan siya sa maong gidugayon.
Tungod sa pagdeklarar og failure of bidding ug pagpahigayon og rebidding, mahimong makasalmot og balik ang ubang napildi nga mga security agency sama sa Davao Cavaliers Security Agency (DCSA), Care Best Security Agency (CBSA), GDS Security and Detective Agency ug TSAI.
Ang na-disqualify nga BPSA bisan sa kontrobersiya, mahimo usab makaapil og balik sa rebidding, dugang ni Tolentino.
“With all the developments, na-prolong naman gyud ni. The governor just wants transparency...” dugang ni Tolentino. (SCG/AZDL)