DUHA na lamang ka mga pasahero sa nalimbuwad nga Ceres bus sa lungsod sa Carmen niadtong Dominggo ang pabilin nga na-admit sa Vicente Sotto Memorial Medical Center ug laing duha nga anaa sa trauma center sa tambalanan nga padayong giobserbahan sa mga doctor.
Samtang, ang Vallacar Transit Corp., ang kompaniya nga nanag-iya sa Ceres bus gihatagan og 72 oras sa Land Transportation Franchising and Regulatory Board pagpanalipod sa iyang habig human sa aksidente.
Si Atty. Edwin Antepuesto, hearing officer sa LTFRB 7, nibutyag nga niluwat na og show cause order ang ilang buhatan sa niaging adlaw nga pirmado ni LTFRB 7 Director Ahmed Cuizon.
Matod niya ang show cause order naghatag og higayon sa Vallacar Transit Corp., pagpasabot kon nganong dili angayan suspensohon o kanselahon ang ilang prangkisa.
Sa pagkutlo ning balita, wala pa madawat sa LTFRB 7 ang tubag sa maong kompaniya.
Apil sa kinahanglan isumitir sa kompaniya ang report sa Motor Vehicle Inspection Center ug resulta sa drug test ni Ronald Lato, ang drayber sa nadisgrasiya nga bus (CCE-679).
Si Dr. Cynthia Genosolango, provincial health officer, niila sa usa sa nahibilin nga mga pasahero nga si Mark John Invento, 11, kinsa nakaangkon og bali sa iyang batiis ug mga pangos sa lawas.
Moabot sa 39 ka mga pasahero sa nalimbuwad nga bus ang nangaangol ug nasamdan sa aksidente. Ang mga naangol gidala sa VSMMC, Perpetual Soccour Hospital ug Cebu Doctor’s University Hospital.
Ang bayranan sa mga biktima abagahon sa tagdumala sa Ceres Bus Liner.
Samtang, nakatubag na ang tag-iya sa Sunrays bus nga gi-impound sa Land Transportation Office human giingong nasakpan nga colorum atol sa operasyon sa Lawaan, dakbayan sa Talisay sa niaging semana.
Apan napakyas pagkuha og kopya ning mantalaan sanglit si LTO 7 Director Arnel Tancinco ug ubang mga opisyal sa buhatan apil na si Cuizon ang gipatawag sa usa ka tigom sa kaulohan bahin sa pagpatuman sa Joint Administrative Order 2014-01.
Base sa inspeksiyon sa mga tinugyanan sa LTO 7, giingong lahi ang chassis no. ug engine no. sa Sunrays bus sa dokumento nga gihuptan sa drayber. (SCG/AZDL)