DUMAGUETE CITY -- Nanghinaot si Negros Oriental Gob. Roel Degamo nga ang mga sakop sa gabinete ni Pres. Benigno Aquino III nga gitumbok ni Janet Lim Napoles nga nalambigit sa PDAF scam ang mahatagan kini ug patas ug balanse nga imbestigasyon.

Awhag ni Degamo nga mapahigayon ang imbes­tigasyon sa mga nalambigit nga pipila ka mga sakop sa gabinete ni Aquino aron masutan kon nalambigit o wa kini sa gibuhiang pasangil ni Napoles.

“Basta ang ako lang naay mga lista nga gi-reveal ni Napoles kinahanglan way pili gyud. Kinahanglan imbestigahan ang tanan kay para gyud dunay gitawag og transparency ug kanang balanse nga pag-imbestigar,” tipik sa pamahayag ni Degamo.

Midugang ang gobernador nga masukod ang pamunoan ni Aquino nga nag-awhag sa “matuwid na daan” kon dunay patas nga pag-imbestigar diin nalambigit ang pipi­la sa iyang mga sinaligang kaalyado.

Sama sa nahitabo kang Sen. Ramon Bong Revilla ug Sen. Jinggoy Estrada nga nabalhog na sa bilanggoan human nalutsan og warrant of arrest diin nalambigit sa P10 bilyon nga PDAF scam nga giingong mastermind niini si Napoles. Apan, ang laing senador nga si Juan Ponce Enrile nagpaabot usab sa iyang warrant of arrest alang sa pagsikop niini. (LEJ)