INAHAN gipauwanag mga bala samtang nagpaabot sa iyahang anak sulod sa tunghaan niadtong Lunes sa alas 10:15 sa buntag sa Barangay Vito, lungsud sa Balamban.
Si Grace Condezar, hingkod ang panu-igon taga Sitio Lingatong, Barangay Vito, namatay nga nadangat sa Vicente Sotto Memorial Medical Center (VSMMC) gumikan sa samad pinusilan sa ulo ug kalawasan.
Wala pa mailhi sa kapulisan ang nag-inusarang mamumuno nga giingong nagtabon og puwang t-shirt sa nawong nga nagsakay sa cannivalized nga motorsiklo.
Si SPO1 Jose Ranielito Villarino, imbestigador sa Balamban Police nga nahinabi sa dySS Super Radyo/Sun.Star Superbalita, nagkanayon nga personal nga motibo sa krimen ang ilahang gisubay karon.
Kini basi sa ilahang nakuhang impormasyon sa bana sa biktima. Hinuon dili lang una nila ikabutyag ang ubang lead nga ilahang gisubay alang sa pagtumbok sa suspetsado.
Ang biktima sumala sa bana nakasulti kaniya nga dunay gikabangi pero wala motug-an kun si kinsa, samtang ang mga kabanay ingon man silingan mipadayag nga walay kontra ang pamilya ni Condezar.
Matud pa niini nga ang biktima naglingkod sa lantay nga kawayan likod sa building sa Vito Elementary School, kauban ang ubang inahan nga nagpaabot sa ilang mga bata nga mamamuhi sa eskwela.
Apan kalit lang ni-abot ang suspetsado nagdalag armas paingon sa nagtapok nga mga inahan hinungdan nga nagkatibuwagsa sila sa pagpanagan.
Ang biktima mikaratel sa pagdagan pero gisundan siya sa suspetsado gipa-uwanag mga bala, hinungdan sa pagkaigo niini.
Nakasulod pa kini sa classroom sa grade 1, apan gisundan gihapon sa suspetsado gitiwasan gipusil sa ulo, una pa kini misibat. Gidala sa Balamban District Hospital si Condezar og gibalhin sa VSMMC diin didto na siya nabugto-an sa kinabuhi.
Usa ka slug sa bala ang narekuber sa kapulisna didto sa crime scene.
Si Villarino miingon nga maglisod gyud sa pag-ila ang mga nakasaksi didto sa lugar tungod sa ka kuyaw ingon man ka kalit sa panghitabo, samtang nakatabon sa sinena ang suspetsado.
Tungod niini gisubay na nila ang gihatag nga impormasyon sa bana sa pamasin nga ilahang matumbok ang mamumuno. (GPL)