MIKATAG ang utok sa asawa human gibunalbunalag alho sa iyang bana nga gamiton unta niini sa paglubok kagahapon sa alas 12:00 udto didto sa Sitio Lagang, Barangay Ocaña, dakbayan sa Carcar.
Si Virginia Aliser, 59, walay trabaho gideklarar nga dead-on-arrival (DOA) dihang nadangat sa Provincial Hospital District Hospital sa Carcar human sa pagkapiyape sa ulo.
Si Alberto Aliser, 57, mag-uuma bana sa biktima bulontaryong mitahan sa kapulisan kinsa naghukas lang nga nagkadugo.
Si SPO3 Jorame Tanudtanud, imbestigador sa Carcar Police nga nahiabi sa dySS Super Radyo/Sun.Star Superbalita, nagkanayon nga ang suspetsado mitug-an kaniya nga nagkaaway sila sa iyang asawa sa wala pamahitabo ang krimen.
Gibutyag niini nga nasuko ang iyang asawa kay dugay siya nga nahuman sa paglubo sa mga mais hinungdan nga nagkalalis, nagka-initay pagmaayo.
Mialegar nga kalit nga mikuhag alho ang iyang asawa gibunalan ang iyang ulo hinungdan nga maayo niyang pagkabungog niadtong higayuna.
Na-ilog niya ang alho hinungdan nga mibawos siya gibunalan niya sa makadaghang higayon ang ulo sa iyang asawa hangtud nga mikatag ang utok niini.
“Nalimot naman daw siya sa iyang kaugalingon mao nga gibulan gyud niya sa makadaghan ang ulo sa alho dihang nakita niya nga wala nay kinabuhi gihunungan” dugang ni SPO3 Tanudtanud.
Pero sangko sa langit ang iyang pagmahay nga nahimo ang krimen kay alang kaniya nakalimot nalang siya niadtong higayuna maong napatay ang asawa.
Gituohan usab nga posibling gisabaan ang suspetsado sa pagsigeg yawyaw sa biktima hinungdan nga niulbo ang panaglalis.
Ang umagad niini nga si Jenica Paninsoro, 19, maoy nakakita sa hitabo apan wala kini makahimo sa pagtabang kay nagpasulabi ang kahadlok.
Kasong parricide ang ipasaka batok sa suspetsado karong adlawa. (GPL)