DAGHAN ang gianugonan sa kalit nga pagluwat ni Dr. Joseph Sol Galleon isip officer in charge sa Talisay City College sanglit nakapakita naman unta kinig maayong ledirato ug maantigo sa iyang trabaho.
Si City Attorney Alfredo Sipalay mihulagway ni Galleon nga usa ka professional ug makiangayon ra nga motan-aw sa mga isyu. Mao usab kini ang panglantaw ni Ched-7 Director Freddie Bernal.
Si Galleon maoy gitudlo sa Board of Trustees nga hulip ni Ched-7 Director Freddie Bernal kinsa una na usab nga miluwat sa puwesto sa dihang gipalagpot ang duha ka mga TCC President nga si Paulus Cañete ug Richel Bacaltos.
Bisan tuod og wala pa ang appointment sa BOT nagsugod na kini sa iyang trabahuon sa maong eskuwelahan ug karon na untang adlawa pormal na ang iyang paghupot sa katungdanan.
Apan sa kalit lang miluwat kini sa puwesto tungod sa rason nga panglawas ug supak ang iyang pamilya.
Si Dr. Elmer Ripalda, sakop sa kampo ni Dr. Paulus Cañete, miingon nga napugos sa pagpahawa si Galleon tungod sa iyang pagkuwestyon niini ngadto sa Civil Service Commission. Miingon si Ripalda nga rason nalang ni Galleon ang iyang panglawas ug supak ang iyang pamilya, tungod kay ang tinuod nahadlok kini sa iyang pagkuwestyon ngadto sa CSC didto sa kaulohan.
Nasayran nga wala pa gani moepekto ang petsa diin siya pormal nang molingkod isip OIC TCC president karong bag-o, si Galloen miluwat na sa katungdanan.
Gisuwayan unta sa pagkuha sa iyang habig si Galleon apan igo lang kining mikonpirmar sa iyang desisyon ug wala na moluwat og pamahayag.
Matod ni Ripalda nga kon padayong molingkod si Galleon sa puwesto iya gayod kining pasakaan og kaso lakip pa si Mayor JVR ug mga sakop sa BOT.
Gumikan niini karong semana si Mayor JVR mopatawag na usab og emergency meeting sa mga sakop sa BOT ug ila na usab nga tukion kon si kinsa ang kasamtangang mangulo sa TCC samtang wala pa sila makakita og permamenting presidenti.
Una niini si Dr. Elmer Ripalda sakop sa kampo ni Canete mihulagway nga conflict of interest ang gihimo ni Galleon. (DRT)